Suu Kyi-i’n Red Cross palai kawm, a dam that hmel

Burmese hruaitu hren mek, Aung San Suu Kyi-i chu International Committee of the Red Cross palai nena an inkawm phalsak a ni a, hei hi kum hnih leh a chanve hnua a fapate pahnih nena lehkha an inthawn hnua pawn lam mi a biak lehna hmasa ber a ni.
Sipai sorkarin an inkawmna thlalak a tihchhuahah Suu Kyi-i hi hrisel hmel takin a lang.
Kum 2021-a sipaiten a kaihhruai sorkar an paih thlak hnuah hren zui a ni a, kum 33 chhung lung in tang tura hrem zui a ni a; mahse, a hnuah tihnepsak leh niin pawn chhuak thei lova hren (house arrest) mek a ni.
Sipaite hian Suu Kyi-i hi a dam a, a hrisel tih sawi fo mah se finfiahna tur chiang engmah an tichhuak ngai lo.
A fapa pakhat, Kim Aris-a chuan tun hnai khan a nu kum 81 mi hi a la dam ngei tih finfiah a nih theih nan ram dangte puihna a lo ngen tawh.
Tun tumah hian ICRC aiawh nena an inhmuh phalsak a ni ta a, hei hi sorkarin kum li dawn hnua pawn lam mi a hmuhtir hmasak ber an ni.
ICRC aiawh nena an lanna thlalakah chuan Suu Kyi-i hi a hahdamin a dam tha niin a lang a, a hriselna dinhmun chiah leh eng nge an sawiho tih erawh hriat theih a ni lo.
Sipai hruaitu, Min Aung Hlaing-a’n a kaihhruai Myanmar sorkar hi kumin kum tir lamah inthlang mah se sipaiten an la thunun hneh hle a, a sorkar hi ram dangin an pawmpui theih nan tun hnaiah an thenawm ram pawh a tlawh zing hle.
Myanmar-a sipai sorkar lakah hian anmahni eptute chenna lai vansang atanga kah tihtawp te, tual chhung indona titawp tura inbiakna neih te leh Suu Kyi-i chhuah te phut a ni.
An laka thil phut hi engmah an ti duh ngai lo va, Thawhtanni tuka inbiakna puanzar hian an ngaihdan an thlak ta em ni tih zawhna a awm phah mek.