Mizoram leh Kungawrhi

FCRA amendment buaipuina boruak sosang mek chu tun hnaia chief minister thusawi chuan a rawn luahlan leh rih, a tih theih awm e. Congress thalaiten chief minister Pu Lalduhoma thlalak pawnfen an fentir zo chauh a, MNF president Pu Zoramthanga chuan chief minister Pu Lalduhoma chu ‘dawih aw’ chhuahah a lo puh ve bawk a. Chutih laiin BJP Mizoram President Dr. K. Beichhua chuan “Kan do loh tur kan do em?” a lo ti ve mek bawk a.
Kan tunlai Mizoram boruak hi Mizo thawnthua Kungawrhi chhanchhuahna mission te kha kan iang dawn dawnin a hriat a. Kungawrhi chhanchhuak tura thawk chhuak Phawthira leh Hrangchala te ‘aw’ kha a inang lo hle a. Phawthira aw kha Khuavangho khan ‘huai aw, huai aw’ an ti a, Hrangchala aw erawh ‘dawih aw, dawih aw’ an ti ve thung a, a hnu lama thil thleng chu Mizote chuan kan hriat vek kha.
Chief minister Pu Lalduhoma’n ILP chungchanga, “…kan hman dan hi a reasonable loh chuan court-ah min khing thei, court-a min khin chuan min paihsak daih thei…dim tea hmang tur kan ni…..” tia a sawi kha a nih a rinawm a, Pu Zoramthanga’n “Dawih Aw” a tihsak taka hi. Pu Zoramthanga chuan ILP chungchangah heti hian a sawi a, “…pawn lam atanga beih leh nek a tawk a nih pawha huaisen taka dolet tur a nih laia, pawn lam atanga beih leh nek tawk lo ILP hman mek ‘central sawrkarin a duh chuan min paihsak thei’ tih Pu Lalduhoma’n a sawi fo mai hi ‘dawih aw’ dik tak a ni..” tiin.
Tuna chief minister ni mek leh chief minister hlui hi kan khaikhin a ni lova, chief minister ni mek hian ‘dawih aw’ a chhuah e kan ti lova, midangin ‘dawih aw’ an tihsak kan ti mai a ni. Pu Lalduhoma hian a thusawi hi han sawifiah leh ta se, a lo pawmnahawm leh viau maithei bawk.
Mizoram hi Kungawrhi anga chhanchhuah ngai dinhmuna ding reng a ni a, ram hruaitute azirin Mizoram hi a himin a him lo mai dawn a ni.
Eng pawh ni se, tu kan sawi chhan ni lovin, tawngkam or tawngkauchheh hrim hrim hi chu fimkhur a pawimawh hle tih kan hre vek ang a; khawvela ram leh ram innghirnghona lo intan thin dan pawh hi ‘tawngkam/tawngkauchheh’ vang te hi a ni duh khawp mai. Bible-ah pawh lei (tounge) veng tha tura infuihna a awm nual a ni lo’m ni? A bikin ram hruaitute hi chu an fimkhur zual a pawimawh hle awm e.
Mizoram chhanchhuak tur hian, kan dinhmun azira Phawthira voice chhuah chang te, a changa Chawngbawla strategy hman a ngaih chang te pawh a awm ang tih hi a rinawm a, rilru fim tak pu chunga englai pawha ‘Mizoram First’ kan tih thiam hi a pawimawh khawp ang le!