Mipui thil lei dan enfiahsak

Mizoram Consumers’ Union, Legal Metrology leh Dawrpui Local Council tangho chuan Inrinni zing khan Dawrpui Taxi Stand-ah Mobile Consumer Checkpost an buatsaih a, mipui mimirin an thil lei a buk dik leh dik loh leh a man dik tak (maximum retail price) in an lei em, tih enfiah sakin, hemi kawnga mipui zirtirna ‘pamphlet’ an sem nghal.
Consumer 150 chuang thil lei chi hrang hrang buk a tling nge tlinglo an endik nawn a. Thilzuar tam takin an thil zawrh, buk tling tha lo an man chhuahsak. Heng buk tlinglo hi an leina dawr leh kawtkaiah buk tling ngei turin Legal Metrology, Dawrpui Local Council leh Consumer Union hmuh laiin an tih that tir leh vek a ni. Thil zuar tam takin bukna hmanraw te chi (metrology certified loh) kitchen scale hmang an awm nual a, hmang zui tawh lo tura ngen leh hriattir an ni. Alu bag lei tam tak phei chu buk tling a awm meuh lo tih an sawi.
Hengho hi Consumer Union-in an leina dawrah an umzui sak dawn a. Hetianga hmalakna hi Aizawl leh district hrang hrangah MCU-in kalpui zel a tum a. Tunkar hian an hruaitu engemawzat an feh chhuak dawn a ni.