Russia-in North Korean missile-in min kap – Zelensky

Zan lamah Ukraine leh Russia an inkap tawn chhunzawm zel a, Volodymyr Zelensky-a chuan Moscow-in North Korean missile a hmang niin a sawi.
Ukrainian president chuan mi paruk vel thihna leh mi 19 hliam tuar an awmna. Zaporizhzhia beihnaah Russia hian an thawhpui ram mite ballistic missile an hmang tih a sawi.
Russia chhim lam, Voronezh-a online retailer, Wildberries kudam chu Ukraine-in an kap fuh a. Russia-a Amazon tia an sawi mai thin hmunhma hi tun hnaiah vawi tam tak an kap tawh.
Inbeihna hi Ukraine-in drone hmanga ramri atanga km 1,100 chuanga hla, Tatarstan-a beihnaa naupang pakhat tela mi 13 an thih tuka thleng a ni.
Thawhtanni zan khan video-a thuchuah a siamah Zelensky-a chuan Russia hian ‘a vawi khat nan North Korea atanga thuam chakna an neih loh chuan an che thei lo tih an tilang’ a ti.
“North Korean-ten Europe-a Ukraine an bei nasa tawh a, an sipaite pawh hman a ni,” tiin Zelensky-a chuan sawi.
A thu sawinaah hian Zelensky-a hian Thawhtannia Siberia khawthlanga Russian petrochemical plant kah fuh a ni chu fakin sipaite tan ‘hlawhtlinna pawimawh tak’ a nih thu a sawi.
‘Ukrainian-ten thuk zawkin, Russia leh Russian-ten muanna a tul tih an hriat theih nan’ thuk zawk abn bei zel dawn tih a sawi bawk.
Tun hi Zelensky-a’n Russia-in North Korea puihna an dawng tih a sawi vawi khatna a ni lo va. Kartawpah khan Russia ram venghim tura North Korean sipai 50,000 thawn a nih thu a lo sawi tawh.
Zaporizhzhia Regional Governor Ivan Fedorov-a chuan lirthei leh in kang thlalak a tar chhuak a, Moscow hian missile leh guided bomb hmangin an khawpui an bei niin a sawi a. Thite bakah mi 19 velin hliam an tuar tih a sawi bawk.
Kyiv-ah mi pakhatin hliam a tuar a, Thawhtanni zan khan air raid siren vawi hnih tihrik a ni a. Khawpui daiah puak ri awmin a kang zui bawk.
Fedorov-a chuan Zaporizhzhia-ah hian industry hmun, mihring chen lohna leh hmun pawimawh dangte Russian-ten an kap fuh tih a sawi.
Ukrainian thuneitute chuan Thawhtanni zan khan Russia-in drone 120 leh missile chi hrang hrang an kap chhuak niin an sawi a, a zat leh an lo kah thlak zat chiang tak an sawi lo thung.
Kyiv-ah chuan damdawi in a chhia a; mahse, thuneituten thawktu leh damlote an him tih an sawi a. Kherson leh Kharkiv-a substation kah vangin power a awm lo bawk.
Sumy City Military Administration hotu, Sergiy Kryvosheenko chuan Russian drone-in Sumy a beihnaah hmeichhe pahnihin hliam an tuar niin Telegram-ah a tar lang a. Civil mite lirthei, kudam leh hmunhma pawimawhte a chhe bawk niin a sawi.
Voronezh region-ah Russia-a online retailer lian ber, Wildberries hmunpui a kang bawk.
Wildberries chuan an hmun beih a nih thu la sawi lo mah se heng lai hmun, ramri hnaiha an hmunhmaa awmte hi an thiar chhuak tawh tih a sawi.
July thla khan Ukrainian drone-ten Wildberries hmunhma tam tak beiin an sumdawnna a buai phah hman hle.