Aizawlah Ex-Servicemen Rally nei

State Level Ex-Servicemen Rally (ESR) chu Ningani khan Aizawlah neih a ni a. Larsap Gen. Vijay Kumar Singh (Retd) leh Home minister K Sapdanga ten an telpui.
Larsap chuan, a hun tam zawk sipai thuam belin a hmang a, ex-servicemen leh an chhungte nena hun hman ho chu nuam a ti takzet tih a sawi. Mizoram ex-servicemen tluka inchei nalh leh felfai India ramah a la hmu ngai lo tih sawiin, “Hei hian inthununna tha a entir a, in chhawmnun zel ka beisei,” a ti.
Mizote chu sipai an tan lai atanga pension hnu thleng pawha entawntlak tak an ni tih a sawi a. State sawrkar chu a theihna leh tulna zawn apiangah hmang tangkai thin turin a chah. India ram hmalam hun hriltu pawimawh tak thalaite tha taka kaihhruai a tul, tiin, ex-servicemen chu an tawnhriat leh ram hmangaihna thinlung hmanga thalaite kawng dika kaihruai thin turin a chah.
Ram leh mipui himna atana theihtawp chhuah thintu ex-servicemen ten ngaihven hlawh lo nia an inhriat lohnan an hamthatna ngaihven zui zel chu mitin mawhphurhna a ni tih Gen. Vijay Kumar Singh (Retd) hian a sawi a. Sipai chhungte inpekna pawh hmuh hmaih theih a ni bik lo tih sawiin, “Sipai aiin an inpekna a nep bik loa, an inghahna bulpui leh a phena theihtawp chhuahtute an ni. Ramri venghimtu sipai leh an chhungte ngaihsak chu ram pum mawhphurhna a ni,” a ti.
Home minister pawhin, ram tana an hun hlu tak hlantu ex-servicemen leh anmahni tawiawm tlat thintu an chhungte chhuanawm a tih thu a sawi a. An service chhungin ramin a mamawh phawt chuan zahzel an siam ngai loa, an pension hnuah pawh inthununna, rinawmna leh inpekna nen khawtlang tan hna an thawk chhunzawm a, khawtlang tana mi hlu tak an ni tih a sawi.
Mizoramah muanna leh himna a awm zel theihnan mipui leh sipai inkarah inremna leh thawhhona tha chhawmnun a pawimawh tih sawiin, ex-servicemen chu mipui leh sipai inkara thawhhona tha a awm theihnan mi pawimawh an ni tih a sawi a. Ex-servicemen leh an chhungte hamthatna atan state sawrkarin a tul angin hma a la zel dawn tih a sawi bawk.