Gandhi kutziak an lilam a Rs 16.2 crore-in an hralh

India hnampa, Mahatma Gandhi kutziak “A Thought of the Day” chu Saffronart lilamnaah cheng vaibelchhe 16.2 (dollar maktaduai 1.2)-in an hralh a, Indian historical document zinga hralh to ber a la ni.
August ni 18-19 khan “Gandhi:” From the Collection of Anand T Hingorani” tiin, Gandhi kaihhnawih thil hlui chi hrang hrang an lak khawm te chu lilam a ni a, he lilamnaah hian Gandhi kaihhnawih thil hlui chihrang 86 a awm a, Gandhi leh zalenna sualtu Hingorani te inkar thil chi hrang hrang niin, Hingorani chhungkuain chhuan eng emaw zat an lo inrochun tawh thilte an ni a, chung zingah chuan “A Thought of the Day” hi an hralh to ta ber a ni.
He collection hian Gandhi leh Hingorani te inthianthat dan a hril thui hle a ni. Hingorani hian Gandhi hi 1930 khan tawngin, heta tang hian Gandhi zuitu rinawm tak a ni zui ta a ni. Hingorani hi Sabarmati Ashram-ah a thawk a, Dandi March-ah telin, Civil Disobedience leh Quit India movement te pawh a zawm a, a hnuah Gandhi kutchhuak thehdarhna kawnga a sulsutu zingah a tel ta zel a ni.
“A Thought for the Day: Gandhi’s 688 autograph reflection for Anand T Hingorani, 1944-1946” hi Hingorani nupui boral hnu kum hnih dawn chhunga Gandhi-a’n Hingorani a fuihna thu ama kutziak ngei a thawn thin dahkhawm a ni.