Mizo kan ni kan hmel a Tha kan tum a sang bawk si -Independence sual ngam kan ni -K. Hmingthankaia

Khatia MNF-in Mizoram Independent puanga India a han do ta mai kha Mizoram hian a tih tur reng ti a lo ni em? Kan tifuh em? Kan hlawkpui nge kan chhiat phah nasa ta lutuk zawk? tih zawhna hi chu engtikahmah a chhanna dik ber, chhiarkawp dan formula anga chawhchhuah dik theih ngai loh tur, inhnialna tawp thei tawh lo tur a ni tawh anga. Mahse, kha kum 20 chhung khan thil rapthlak tak tak leh tih duhdahna nasa tak leh hrehawm tam tak te chu lo tuar tawh pawh ni ila, kan tuara kan tuar zo tawh tho bawk a, inhnial nan hmang tawh lo ila, kha kan Zoram buai khan a tha lam zawnga nghawng a neih ni thei awma kan ngaih lam pang zawkte pawh hi i sawi thin tawh zawk mai ang u hmiang, a hahdam thlak zawk tawh mai lo maw, te ka ti ta deuh mai mai a ni e. Tin, kha kan ram buaiin a tha zawnga a nghawng chhuah niawma kan hriat chhun ang angte pawh chu tha takin vawng nung zel bawk ila, te pawh ka han ti ve a nih hi. Mahse, chhungkaw tam tak tan chuan an tawrhna rapthlak tak takte avang khan, a thatna lam sawi chu harsa an ti ngei ang le. Kei pawhin chhut fe phawt loh chuan a that zawkna lam chu chuti maia tuna han sawi tur chu ka hre nghal mai bik lo a ni. Mahse, that zawkna mual mual chu a lo nei tho ang chu. Chuvangin, tunah hi chuan ka rilrua zeldin thu awm thil ho mai mai tlemte ka’n sawi mai mai teh ang.
Mizoram chuan mau tam tram kan tuara, mahse, Assam state chuan min ngaihsak tha duh lo nia kan hriat avang khan, Pu Laldenga leh mi thenkhatte lungawilo khan, Assam leh India koh ei nan leh runluih nan khan Mizoram indenpence kha an puang ta mai kha a ang ta ber mai a. Amaherawhchu, khati pui pui lo deuh pawh khan nawr dan chu a awm mai lo maw? Khatih lai khan kawng dang an lo hre thlawt lo em ni? Mau tam tram tawrh aia nasa fe zawk, rei fe zawk chu kan lo tawrh phah ta zawk si a lo nih kha. Vawiin thleng hian kan la innghirngho phah leh ta nghala. A nghawng tur hresa chung reng si khan, mahni tana thil dang engemaw beisei ruk avang zawk khan, mau tam tram chhuanlama hmang khan tute emaw khan kan ram tana buaina lianpui chu an lo chawkchhuak ta a ni thei zawk mai ang em le?
Khatih hun lai velte kha chuan Mizo nawlpui kha chu kan la mawlin kan khawsak dan pawh a la hnuaihnung ve hmel hle a ni. Kan mawng ek pawh hmawlh te leh hnimhnah hmanga la thiar thin, hmun thenkhatah phei chuan vawkpui no hruaite nena la daikal za thin, zanlaia khuma naute ek pawh, ‘chiuhiah’ tia uipui la liahfai tir mai mai tawkte pawh kha kan la nih hmel si a. Chuti chunga Independence kan han sual ta rup ngam mai kha chu a pui chu kan lo pui teh e. Kan tum chu a lo sang chiang alawm.
Indo buai ngai lo khan India khan, nangni hi in khawvel lo awm chho zel tur hi in ngaihtuah chiang maw? Nangmahnia in awm theih dawn tak tak phawt chuan, tlawhpawh in harsat teh lul nen, in duh phawt chuan indang daih rawh u, te kha min lo ti ta phut mai ta se la, engtin tak chuan awm leh tak si ang i maw, te ka lo ti deuh vel mai mai thin a. Khawvel hmasawnna hrang hrangte kha duh chhoh ve zel nachang te kha kan han hria anga, e khai, kan lo ti sual reng mai a ni, mahni chuan kan inhaikaw zo dawn lo, in thlazar hnuaiah hian min lo awmtir leh mai ula, hmalam min panpui zawk rawh u, tiin India chu kan bel leh chung mai si lo ang maw? tih chang te pawh ka nei thin bawk.
Khatih hun lai tawh pawh khan, Zofate zingah khan mi hawizau leh chinchang hre ve tak tak tawhte pawh kha an lo awm ve nual tawh a. Chu’ng ho chuan MNF thil tih tum chu engmah awmze nei lo tur, independence chu teuh lo mai, harsatna leh buaina nasa tak, tawrhna nasa tak thlentirtu tur mai mai a ni e, tiin, an thil tih tum chu ti lo tur khan an lo sawi tawh thin a ni awm e. Mahse, MNF chuan an tih luih chhoh zel tak si avang khan, mi thenkhatte chuan tihelna tawngkam ngeiawm tak tak leh nuihsawhna tawngkamte pawh kha an lo chhakchhuah phah ta hial a nihawm kha.
Khatih lai khan MNF hruaitu lian zingah pawh khan Independence chu thil theih loh tur a ni tih hria kha chu an awm ve tho maithei a ni. Mahse, kan ram buaina leh mipuite tawrhna phenah khan an tan engemaw beisei tur an nei pawh a ni maithei a. Anihloh vek pawhin, engemawni khan tih-atin an awm anga, Pu Laldenga pawh tiamin, an vai mai khan independence hmuh mai theih tak tak te pawh kha an lo ring tak tak te chu a ni maithei bawk. Tin, khati taka nasa khan kan tuar leh si dawn tih pawh kha an lo ring pha bik lo pawh chu a ni thei bawk ang.
Engpawh nise, khatih lai kha chuan MNF ho mai bakah khan, Mizo zawng zawng kha chu tih-at khan an awm hrim hrim a ni mai awm e, kei chuan ka ti deuh tlat a ni. MNF hruaitute thusawi bakah, Pu Laldenga’n tawngkam thiam tak maia thu awihawm tak tak a sawite chuan Mizopa rilru huaisen leh hnam chhan tina em emtute thinlung chu a rawn chhunfuh ta thin a. A tawngkam ngaihnobei tak takte chu Mizote rilru nona lai takah chuan an zu chhunglut ta thin bawk si a. Tichuan, khatih lai kha chuan kan vai deuhthaw, Mizo zawng zawng deuhthaw kha chu rilru hmunkhatah kan awm a. Mizo hnam rilru MNF thlarau dik tak kha kan chang vek hi a ni deuh ber mai a ni.
Khatih hunlaia Mizote kha tunah hian tumah kha indem tur kan awm chuang lo. Pu Laldenga leh MNF hruaitute emaw, MNF leh F lo emaw, Vawlawntiar leh tiar lo emaw, ramhnuaia chhuak leh chhuak lo pawh kha, kan vai deuhthaw mai khan Mizo hnam rilru MNF thlarau dik tak khan min man vek a ni. Tih-ata awm kan lo nih pawhin kan vai khan tih-ata awm kan ni mai.
Amaherawhchu, Mizote khan chinchangte kan han hre zau chho ve ta zel a, kan lo hawi zau ve zel a, khawvel leh sawrkar awmziate, keimahni awmzia tak takte chu kan lo hre chiang chho ve ta zel bawk a. Idependence suala India dova rambuai nih ringawt mai chu tul lova tawrhna nasa tak leh hrehawmna tam tak thlentu mai mai, Mizote khua min ti tlaitu tur mai mai niin kan lo hre tan ta a ni. Chumi avang chuan Mizo tam takte thinlungah chuan, hmana tih-ata kan lo awm tawhna, MNF thlarau dik tak rilru pawh chu a lo thi chho tan ta zel bawk a ni.
Chutih lai mek chuan MNF hruaitu thenkhatte pawhin an thil tih dan leh an thil tum chu tha lo tih an lo hre ta nge ni, anmahni MNF ber pawh chu anmahni leh anmahni chu nasa taka intibuaiin, India nena an buai thawm ai pawhin anmahni buai thawm chu a lo ri ring zawk ta fo emaw ni leh ta nghal bawk nen. Chumai ni lovin, an buai dan lah chu India laka Independence sual lam pawh chu ni tawh lo khan, India nena inbiakrem dan tur chungchang ringawta buai kha an lo nih tawh zawk hmel bawk si nen khan, Mizo mipuite chuan rambuai kan nihna hrehawm tak hi a lo tawp theih tawh nan chuan, India leh MNF chu engti ang zawng pawha inremna nei turin kan lo nawr ta zawk a nih kha.
Chutichuan, June ni 30.1986 zanah chuan eng eng emaw an inremna tur thute chu ziah hnanin, India sawrkar leh MNF chuan inremna an lo siam ta a ni. Mizoram rambuai hrehawm tak kan nihna tawp tawh theih nana intibuaite pahnih, India leh MNF-te ‘INREM’ hrim hrim kha chu Mizo mipuite duh dan a ni a. Mahse, an inremna THUTHLUNG zawng zawng erawh chu Mizo mipuite duh dan a ni vek kher lo. Loh theih lohna avangin, dan angin Mizoram sawrkar aiawh chuan hming sign ve mah se, kha MNF leh India sawrkar inremna thuthlung kha chu Mizoram sawrkar duhthusam pawh a ni bik bawk hek lo ang. A chhan chu, Mizoram sawrkar chu kha inremna tura thuthlung siamtu kha a ni lo tlat a ni. A siamtute chu intibuaite pahnih India sawrkar leh MNF-te an ni.
Tichuan, hmana tih-ata kan lo awm laia Mizote thinlunga MNF thlarau dik tak awm thin, zawi zawia lo thi chho zel pawh chu, India leh MNF-ten Remna an lo ziah tak chiah khan a lo thi fel ve ta a ni. India leh MNF-ten, “Mizoram hi nghet takin India ram bung khat a ni e” tih thu an nemngheh rual chiah khan hmana MNF dik tak hmasa pawh chu a lo ral fel ve ta nghal bawk a ni.
Chuvangin, tuna MNF party hi chu midang ang bawka lalna leh thuneihna chuhtu political party, mahni ropuina tur leh pumpui hmachhuan party ve tho, intih hausak tumna political party, sum zawnna political party ve tho kha an lo ni ta a nih chu. Chuvangin, mahni hamthat nan chauh leh mahni tanghma hai nan chauh hian hmana MNF tak takte hming hi chu tumah hian rawn chhal fo ni tawh lo sela. Mizote thinlunga hmana MNF tak takte ngaihsanna leh an zahawmna an rawn tinep zova, an ti bawrhbang zova, Mizote thinlungah an tihlum zo thei takngial mai dawn alawm le. Chumai a ni lo, hmana MNF thlarau dik tak changtute tawrhna zozai leh an thlarau pawh an zahawm lutuk e.