School provincialise belh tur ngaihtuah mek

Sawrkarin school provincialise tura a tihfel tawh bak, danin a phut ang tlin phaa ngaih ho provincialise belh dan tur ngaihtuah leh mek a ni tih Education minister chuan a sawi.
Thawhlehnia Assembly Session-ah zawhna chhangin School Education minister Dr Vanlalthlana chuan, tun sawrkarin school 51 a provincialise bak tih belh tumin cabinet-in a ngaihtuah tawh a. Criteria duan hmangin endik leh mek a ni tih a sawi.
High school bikah tehna chi 5 hmangin teh an ni dawn a. School upat dan azirin; Municipal area, district headquarters, SDEO office awmna bak chu ‘others’ a dahin enrolment neih dan (a hmaa hrut rual puk ang lo deuhin), a bulhnaia school din sa leh school dang nena a inhlat dan, school awmna khuaa in awm zat en a ni anga, hma lak chhoh mek a ni tih a sawi.
“School thenkhat, result-ah zaa 20 pawh pass tir thei lo, building nei lo leh zirlai nei mang lo, school awmsaa zirlai 20 vel awm lai, school dang dina zirlai 20 pawh nei tling mang lo te hi chu sawrkarin laksak a ba em tih hi kan ngaihtuah a ni,” a ti.
Zirtirtute sual vang a ni lo thei a, harsatna an tawh dan chhan hrang hrang a awm thei a, ngaihtuahna thuk tak sawrkarin a seng mek tih minister hian sawiin, a tahtawlin an buaipui anga, central-a Project Approval Board-in a phalsak tawh chin a awm a, kumina tih hman loh, nakuma dil tha tura an lo tih pawh a awm a, upgraded school tur hi ngaihven chhunzawm zel a ni dawn tih a sawi a ni.
School Education department an chan chinah an ni chuan DP&AR, Finance leh Law department kaltlangin thil an ti zel tih Dr Vanlalthlana hian a sawi bawk.