Chhiat tawk Nepal pui turin India inpeih

Indian defence minister chuan Nepal-a Nilainia sabereka khuangkaihin chhiatna nasa tak a thlennaa chhawmdawl leh chhanchhuah hna thawk turin Indian Air Force (IAF) an inbuatsaih a, thenawm ramin a mamawhah chet chhuah a tum tih a sawi.
Nepal-a sebereka khuangkaih thawkah hian Nilaini tlai thleng khan mi 16 vel thi awm tawhin mi za tel chin hriat lohvin an awm a. An chin hriat loh zingah Indian pawh 100 chuang an tel.
India hian chhawmdawlna thil a rang thei ang bera thawn turin a inbuatsaih a. IAF chuan puihna pe turin an inring reng tih sorkar thuchhuah chuan a tar lang.
IAF thlawhna, C-17 leh C-130 te chu Nepal-a chhawmdawlna hmanrua, damdawi leh lei laihna hmanrua phur chhuak thei turin an inring reng.
Indian sorkar chuan National Disaster Response Force (NDRF) pawh thenawm rama chhawmdawl leh chhanchhuah hna thawk tura chet chhuah a ngaih thuta che chhuak nghal thei turin an inpeih bawk tih a sawi.
An thenawm, Tibet lam atanga thawk sabereka khuangkaih hian Nepal-a Nuwakot leh Dhading district nuaiin chhiatna a thlen nasa hle a. Khaw tam tak, kawng leh lei te a hnawl chhia a. Hydro power project leh thil dang tam tak tichhe bawkin chhanchhuah leh chhiatna thlen dan kimchang hriat tuma thawh mek a ni.
Nepal-a chhiatna a thlen hnuah hian India-a Uttar Pradesh leh Bihar-ah pawh ruah sur nasa avanga thenawm rama chhiatna thleng kal zelah a thlanga luiah pawh a thawh ve theih avangin inbuatsaihna an kalpui.
Bihar-a lui lian tam tak hi Nepal atanga luang lut niin heng zinga hriat hlawh tak chu Gandak River (Narayani tia sawi bawk) a ni a, he lui hi Kosi River lui nen sabereka khuangkaih thlenna pakhat zawk a ni a. Heng luite hi Himalaya-a hnar nei niin Tibet atangin Indian phaizawlah a luang zel a ni.
Bihar Chief Minister Samrat Choudhary-a chuan thil thleng leh thleng theite thlithlaiin mi pawimawh thutkhawm a ko nghal.
“High-level team din a ni a, chief secretary leh DGP te pawh thil thlithlai tura tih niin kei pawhin thutkhawm ka ko va. A tul a nih chuan kei pawh ka che chhuak zel ang,” tiin thuthar lakhawmtute a hrilh.
Union Home Minister Amit Shah-a pawhin Bihar chief minister hi an state inbuatsaihna sawipuiin a be bawk.
Uttar Pradesh Chief Minister Yogi Adityanath-a pawhin an state-a Maharajganj leh Kushinagar chu bengchhi tura tih an nih thu a sawi a. “Gandak leh Narayani luite chim chin sang zelah Uttar Pradesh-a Maharajganj leh Kushinagar district-ah tui lian a awm thei a, tual chhung thuneitute chu beng chhia a tul anga inbuatsaih tura tih an ni,” tiin X-ah a tar lang.
Uttar Pradesh-ah pawh hian Ghaghara (Karnali), Sharda (Kali), Gandak leh Rapti te chu Nepal atanga luang lut a ni.