Nepal-ah sabereka khuangkaih vangin mi 16 thi, za tel chin hre lo

Nepal-a Bhote Koshi River-a sabereka khuangkaih thawkin Nuwakot leh Dhading district-a chhiatna a thlenah mi 16 vel thi awm tawhin Indian 105 telin mi tam tak chin hriat lohvin an awm.
Tui lian leh hnawl tam takin Tibet lam atanga thawk niin Nepali chanchinbute chuan khua tam tak a hnawl a, thil a tichhe nasa hle tih an tar lang.
Central Police thupuangtu, Deputy Inspector General of Police Abinarayan Kafle-a chuan district pahnihah hian ruang pariat hmuh tawh a ni tih a sawi tih Nepal News-in a tar lang.
Nepal Tourism Board chuan tui lenna hmunah hian khualzin 384 vel, ram dang mi 291 leh Nepali 93 chin hriat lohvin an awm niin a sawi a, ram dang zinga mi 105 hi Indian an ni.
Thuneitu chuan Rasuwa district-ah Nepal Police 26 vel chin hriat lohvin an awm niin a sawi a. Armed Police Force pawhin an sipai pasarih chin an hre lo tih an sawi.
Nepal Army chuan helicopter leh chhiatrupna thleng hmachhawn thiamte an tir a. “Chhiatna thlen dan kimchang hriat tuma lak khawm mek a ni,” tiin thu an chhuah.
Nilainia tui lian chak tak thawk hian Nepal-a hmar lam district a tibuai nasa hle a, kawng a chhia a, power pekna a chhe nasa hle bawk.
Nepal Electricity Authority (NEA) chuan hydropower lian sem darhna hrang hrang – Rasuwagadhi, Chilime, Trishuli 3A, Trishuli 3B Hub 220 kV Substation, Trishuli Hydropower Station leh Devighat Hydropower Station te a chhia tih an sawi.
“Chhiatna hian power siam chhuah, sem darhna leh pek chhawnna a tichhia a, hei hian electricity pek a tibuai hle,” an ti.
Kawngpui lian tam tak pawh khar a ni tih thuneitute chuan an sawi bawk.
Nepal Police-in video an tihchhuah leh social media-a darhah chuan chirh nena inpawlh tui chak tak hian Himalaya tlangdung rama Tibet nena inri district-te a nuai na hle tih a lang.
“Eng ang fakauva chhiatna nas nge a thlen kan la hre thei lo va, a nasa em mai a, mihring chenna tam tak tichhe thei a ni,” tiin Nepal Police thupuangtu, Abi Narayan Kafle-a chuan AFP a hrilh.
“Lui hnaiha chengte chu insaseng turin kan hriattir a, kan theih ang angin puihna pawh kan pe a ni,” a ti bawk.
Prime Minister Balendra Shah-a chuan National Disaster Risk Reduction & Management Authority thutkhawm hmanhmawh a ko nghal a. “Medical team, scout leh Red Cross te nen a tih theih ang ang ti turin hna tan nghal a ni,” tiin social media-ah a tar lang.
June leh September inkara fur lai hian Asia chhim lamah ruah kaihhnawih chhiatna a thleng nasa thin a. Scientist-te chuan sik leh sa inthlak nasain khaw awm dan uchuak tak tak a siam nasa zual niin an sawi.