Putin-a leh Xi-a inbia, inkungkaihna tihnghet zel duh

Chinese President Xi Jinping-a leh Russian President Vladimir Putin-a te chu Kyrgyzstan-a Shanghai Cooperation Organisation (SCO) summit-ah inkawmin khawvel dinhmun khirh tak karah an inkawpna tihnghet zel tha an ti.
May hnua an inkawm lehna hmasa ber, Thawhtanniah hian Xi-a chuan Putin-a chu an inhmuh leh theih avangin ‘a hlim’ tih a hrilh a. Ukraine nena kum ngena atana indo mek, Russian hruaitu hnenah hian Beijing leh Moscow inkar chu a thang ‘nghet tawh hle’ tih a hrilh.
‘Khawvel pumah thil chiang lo leh sawi lawk theih loh’ thleng mek karah chhunzawm zel tha a ti tih a hrilh a. China hian Russia-in a thenawm a donaa a pui nia sawina erawh a pha.
Xi-a hian Putin-a hnenah hian ‘khawvel dinhmun chiang lo leh sawi lawk thei loh tam tak awm karah’ Beijing leh Moscow inkungkaihna chuan ‘hma lam êng’ an nei tih a hrilh.
Putin-a pawhin ‘thawhhona chuan kil tinah hlawhtlinna lam a pan’ tih a sawi bawk.
Ni hnih awh SCO hi Kyrgyz khawpui, Bishkek-a neih niin kum 25 a tlinna a ni.
Iranian President Masoud Pezeshkian, Indian Prime Minister Narendra Modi leh Pakistani Prime Minister Shehbaz Sharif te bakah an thawhpui, Turkish President Recep Tayyip Erdogan te pawh an tel.
Putin-a leh Xi-a hian a hma pawhin SCO summit hi an thlir dan puan chhuahna leh khawthlang ramte dona tura inthurualna tur sawi chhuah nan a hmang tawh thin.
Ukraine an rûn avanga khawthlangten an ensan hnuah Russia hi China-ah a innghat thui hle a. Khawthlang ramte hian Beijing hi indo titawp tura Moscow nawr turin an lo kar tawh thin.
Hetih lai hian Kremlin thupuangtu, Dmitry Peskov-a chuan Russian chanchinbute hnenah hruaitu pahnihte hian eibar lam an sawi a, Ukraine indo chu ‘an sawi liam puat’ niin a hrilh.
Putin-a hian Modi-a pawh a kawm a, car pakhata chuangin an inkawmna tur hmun an pan dun a ni.
Putin-a hian Pezeshkian-a pawh a bia a. Ram pahnihte hi khawvelin a kawmserh nasat ber ramte niin Moscow-in Ukraine a rûn hnuah sipai leh eibarah an inpawh zual sauh thung a. Iran hian Russia hnenah hian drone a hralh nasa a ni.
US President Donald Trump-a chuan Moscow leh Beijing chu Iran thawhpui tawh lo turin a lo ti tawh thin.
Bishkek-a inbiakna hi thla khat dawn hnua US leh Iran inkah thar leh hnu lawkah a ni a, Pezeshkian-a chuan indo chhunawm leh chu Tehran duh dan a ni lo tih a sawi.
SCO summit-ah hian Putin, Xi, Pezeshkian, Modi leh Sharif te hi Kyrgyzstan President Sadyr Japarov-a kaihhruai plenary session-ah thu an sawi hlawm.
A tirah SCO hi member 10 an ni a, thawhpui, dialogue partner’ an tihte nen chuan 15 an ni tawh a, heng zingah hian Turkey, Saudi Arabia leh Qatar pawh an tel a. Observer pahnih, Afghanistan leh Mongolia an tel bawk.
Member ram tam lo mah se khawvel mihring 40% chenna ram niin khawvel sum thawh chhuah 25% thawhtu an ni bawk a, an huhang a na viau a ni.