Lei dawh chawpin hmun kilkhawr hai zel

Lei dawh chawpin hmun kilkhawr hai zel
Chawlhkar khat dawn liam taa sabereka khuangkaihin chhiatna a thlen hnuah Nepali chhanchhuah hna thawktute chuan hmun kilkhawr zawka mite pui turin lei dawh chawpin an la thlen lohna lan an thleng mek zel a, hydropower project-a thawktu tangte chhanchhuah tumin an bei mek bawk.
Hydropower station hrang hrangah thawktu 600 chuang chhiatna avang khan an tang a, heng mite hi chhanchhuah tuma beih mek a ni a. Hetih lai hian Prime Minister Balendra Shah-a chuan mi 11,000 chuang chhanchhuah tawh niin hmun thenkhatah chuan power leh inbiakpawhna pawh tihthat leh tawh a ni tih a sawi.
Kar kal ta Nilainia sabereka khuangkaih avanga chhiatnaah khan Thawhtanni zanlai thleng khan mi 939 vel thi an awm tawh tih Shah-a chuan social media-ah a tar lang a. Chin hriat loh hi mi 6,000 chuang an la awm bawk.
“Khua leh tui sang telin an in, an chhungte, an hmangaihte leh an bungrua an hloh a ni,” a ti.
“An tawrhna hi sorkar chuan a hriatthiampui a. An hmabakah puia nun pangngai an zawh leh theihna turin chhawmdawl a tum a ni,” a ti.
Rescue team-te chuan a tuar na ber district, Nuwakot pawh theihna turin kawng siam tlang hna an thawk a, chhanchhuah leh chhawmdawlna thil semna atan tih hmasak a ni tih Shah-a chuan a sawi.
Vur tlang chimin vur, lung leh chirh a tawlhpuiah China nena inrina bawra hmun changkang lo lai velah hian chhiatna nasa tak a thlen a, in sang tel chhia a awm a. Thla ruk chauhva upa, Nepal-a Shah-a kaihhruai sorkar tan chona lian tak a siam a ni.
Police thuneitu, Bipin Regmi-a chuan search team-in Nuwakot district-a Betrabati khuaa in pakhatah ruang 24 ​an hmu tih a sawi.
“Hmun thar kan thleng a, ruang kan hmuh belh zel a ni,” tiin Reuters a hrilh.
Shah-a chuan chhiatna an tawh hnuah tanpuina $ maktaduai 42 an hmuh tawh thu leh sorkar chuan a dawn belh zel a beisei tih a sawi.
An thenawm, India leh China pawhin an pui nasa a, hmun kilkhawr thlen theihna turin bailey bridge dawh turte an pek bakah ruang hmuhte finfiahna turin mi thiamte thlengin an tiar a ni.
Shah-a chuan mi 1,000 dawn tang an awmna nia thuneituten an hriat, hydropower project hrang hrangah thawktu 279 chhanchhuah tawh an nih thu a sawi a. Mi dangte pawh hi an chin hriat tuma beih mek zel an ni bawk.
Rescue team-te thlalak leh video an tihchhuahah chuan lei khawihna hmanraw lian hmangin thim mup karah chirh leh leite hai a ni a. Sipaite pawhin torchlight ​hmangin leiverh chhunga luh theihna an dap bawk.
Nepal-ah hian hun rei tak chhung chu power a harsa thin a, tualchhunga indaih lohna awm thin tihtawp nan tun hnai atangin Himalaya tlangdunga tui tha tak an neih chu remchangah lain hydropower project atan an kalpui thar nasa a. Nakin zelah phei chuan chhim lama an thenawm, India hnena hralh theih dan tur thlengin ruahmanna an siam a ni.
Hydropower project-ah hian luite chak taka luanga electricity siam chhuahna tur khawp a nih theih nan tlangte chu verha hmalak a ngai thin a, hei vang hian lei verh pawh an ngah viau a ni.