Thianghlimnaah school inelna siam dawn

Fai leh thianghlim awngah sawrkarin school inelna a siam dawn a. Hemi kawnga , hmahruaitu ni tura school naupang chher chu he thilin a tum ber a ni tih UD&PA minister K Sapdanga chuan a sawi.
Swachha Bharat Mission 2.0 hnuaia Mizoram puma faina leh thianghlimna kawnga school inelna tur ‘Mizoram Green Schools League’ chu Thawhlehni khan Aizawlah K sapdanga hian a hawng a. UD&PA department leh School Education department tangdun buatsaih he thil hi, school naupangten fai leh thianghlim an ngainat a, an puitlin thlenga an nitin nunphunga fai duhna an nunpui tlat theihna tur inzirtirna tha a ni tih a sawi.
Hmasawnna leh changkanna tehfung pawimawh ber zing ami chu faina leh thianghlimna a ni, tiin, “Zirlaiteah fai duhna thinglung tuh nghet a, an school, an chhungkua leh khawtlang vawnfai kawnga hmahruaitu ni thei tura chher hi Mizoram Green Schools League tum a ni. Kan ram hi kan tu leh fa, chhuan lo la awm zel turte tana luah tlaka fai leh thianghlim taka enkawl hi mitin mawhphurna lian tak a ni a, he mawhphurhna hlenchhuak tur hian naupang atanga puitling thlengin chanvo pawimawh kan nei a ni,” a ti.
Inelna hian lawmman sumfai engemawzat a keng tel tur chu thil lawmawm tak a nih rualin, lawmman dik tak zawk erawh school hrang hranga zirlaiten fai duhna thinlung an pu tur chu a ni tih UD&PA minister hian a sawi bawk.
School Education minister Dr Vanlalthlana pawhin tunlaiin fai kawngah Mizo thlalai an thangharh nasa hle, tiin, mahni thua mimal leh thianho tangruala hmun tawp leh bal lai deuh tifaia an che chhuak hriat tur a awm fo thin tih a sawi a. Fai kan ngainatna chu state pawn lam khualzinte tana zir tlak leh entawn tlak tura chhawmnun zel a pawimawh tih a sawi.
Mizoram Green Schools League hi block level, district level leh state Level-a kalpui tur a ni a. State level-a pakhatna in Rs. 1,00,000; pahnihna in Rs. 70000 leh pathumna in Rs. 50000 a keng. District level-a pakhatna in Rs. 10000, pahnihna Rs. 7000, pathumna Rs. 5000 a keng.
Block level-a school titha 5 thlanchhuah chu district level-ah endik an ni anga, district level-ah hian a tha zual pathum thlanchhuah an ni ang. State level-a inel turin district tin atangin a titha ber an tel dawn a ni.
Ruahman dan chuan, school fai inelna endik hi October 12 atanga kalpui tan tur niin, December 18 thleng awh tur a ni. He hmalaknain a tum chu, school zirlaite hnenah bawlhhlawh thliarhran zirtir, vawikhat hman plastic hmang lo tura inzirtir, zirlai nitin nuna fai duhna seng luh tir, fai tura hmalakna hrang hranga hruaitu ni tura zirtir a ni.