Balu sumdawnna avangin lirthei dang tawn

Balu-a sumdawnna atanga irhchhuak Mizoram leh Assam lama lirthei liana eizawngte chuan lirthei an indan sak tawn mek karah Silchar-ah Mizorama lut tur lirthei tangkhang an awm mek laiin, oil leh gas phur bakah khualzin phur lirthei erawh dan an ni lo tih sawi a ni.
Mizorama-a tipper hmanga eizawng pawl pathum chuan Bagha lama balu an phurhnaah harsatna an tawh thin avangin thla kalta atang khan Mizorama lut tur balu hi an dang tan a. Hemi nghawng zelah Silchar Truck Driver Association chuan an member, Mizoram lama lut turten harsatna an tawh phah nia sawiin August 30 zan atang khan an tlan duh lo ve thung.
Silchar Truck Driver Association hian kumin August 1 atang khan Assam registration lirthei, balu phurten Mizoram lam, Kolasib district chhungah harsatna hrang hrang an tawk a, dan ang thlapa an balu phurh chu kawng lakah mi thenkhatin tidingin, an bun tir hnuah ruakin Assam lamah an haw tir leh niin an sawi. Hei bakah driver-te hian vau bakah inhnuaichhiahna an tuar nasa niin an sawi a; an dinhmun a him lo tih an sawi.
Mizoram sawrkar leh Kolasib district bawrhsap chu thil awmzia chhuifiah a, hetianga lirthei dan leh endik hi sawrkar dan anga kalpui a ni em, tih leh, chutiang a nih chuan puangzar a, dan zawm dan tur hrilh turin an ngen a. Sawrkar hriatpui leh dan anga kalpui a nih loh chuan driver-te himna atan hma la turin an ngen tih an sawi a ni.
Hemi chungchang hi Mizoram leh Assam chief minister hnen bakah Kolasib district bawrhsap leh Cachar district bawrhsap hnenah ziakin an thehlut tawh a, an thil phutah hian state pahnih sawrkar atanga hmalakna leh an harsatna sutkian tum lam engmah an dawn loh avangin lirthei dintir rih hi an titlu ta niin an sawi a ni.
Thudawn danin, Silchar Truck Driver Association hian Bagha four lane junction-ah Assam atanga Mizoram lama lut tur truck hi an dang a. Thawhlehni tlai thleng khan truck 50 chuang an ding tawh tih sawi a ni. Hetihlai hian oil leh gas phur bakah khualzin phur lirthei chu dang loin an tlangtir nia sawi a ni.
All Mizoram Commercial Tipper Association (Owners and Drivers), Mizoram Tipper Association Gen. Hqrs. leh Mizoram Tipper Association District Hqrs Kolasib chuan Bagha-a balu an phurh thinah Assam sawrkar official atangin tul lo takin harsatna an tawng fo a, sum chuang liam an chawi phah fo bawk a; he thilah hian balu mahaldar-ten an pui lo mai niloin, anmahni dan zawm loh avanga he thil hi tawrh phah nia an inhriat thu sawiin, he thila lungawilohna avang hian Mizorama ‘Bagha balu’ lakluh tur hi an dang tih an lo sawi tawh a ni.