Lung in atangin Sisodia-an PM Modi bei zui

Delhi education minister hlui leh Aam Aadmi Party leader ni bawk Lung ina tâng mek Manish Sisodia chuan India mipuite lehkha a thawnah Prime Minister Narendra Modi zirna lama thlen san loh lutukna chu India tana ‘hlauhawm’ tiin a sawi.
An party boss Delhi Chief Minster Arvind Kwjriwal pawhin PM chu a college degree chungchangah thudik lailang turin a cho bawk a. Hei vang hian tun hnaiah Kejriwal chu Gujarat High Court chuan PM graduation leh post-graduation degree te Right to Information (RTI) hmanga a dil kaihhnawihah Rs 25,000 a chawitir a ni.
Manish Sisodia lehkhathawn hi kutziak niin Chief Minister Arvind Kejriwal chuan a tweet zui a, “Vawiina thalaite hian hlawhtlin an duh a, hun remchang leh tha an zawng a ni. Khawvel hnehtu nih an duh. Science leh technology ah thil mak tih an duh a. Chungte chu lehkhathiam lo PM hian tuna thalaite beiseina hi a tihlawhtling thei dawn em ni?” tiin Sisodia lehkhathawnah chuan tarlan a ni.
Sisodia chuan science leh technology chu ni tin hmasawn mek reng niin khawvel chuan artificial intelligence a sawi mek tawh a ti a. “Chutih laiin Prime Minister ber chuan gas bal chu pipe hmanga la in thingpui leh chaw te kan chhum thei a ni a ti a. Gas bal hipin chaw chhum theih a ni em? Theihloh e. PM hian radar chuan chhum piaha thlawk thlawhna te a man thei lo a ti tawh bawk a, khawvelin a nuihsawh phah tawh a. School leh college zirlai ten an nuih a ni” tiin a sawi.
Khawvel pumin India Prime Minister chu lehkha zir sang lo a ni tih an hria a, science basic knowledge pawh a hre lo, tiin Sisodia chuan a sawi bawk a. Hruaitu dang ten PM chu an kuah (hug) thin a, an kuah man a sang hle. Lehkhapheka an hming an ziah tirna eng nge a nih ka hre lo va, a chhan chu PM chuan a hrethiam lovang a zir sang lo em a, tiin a sawi bawk.
Tun hnaiah India ramah school 60,000 chuang kharin a awm tia sawi bawkin Manish Sisodia chuan chumi awmzia chu he sorkar hian zirna a ngaih pawimawh ber lohzia a pholang a ni a ti bawk a. “Kan fate zirna tha kan pe lo a nih chuan, engtiangin nge ramin hma a sawn theih ang? Teuh lo mai,” tiin a sawi bawk.
“PM Modi-an inchhuang taka lehkhathiam lo a nih thu a sawina video ka en a. Thingtlang school-ah chauh lehkha a zir thu a sawi a. Lehkhazir hniam leh thiam loh hi inchhuan tur em ni? Ram khat PM berin a lehkhazir san loh a chhuanna ram chuan an fate zirna tha an pe ngai lovang” tiin Sisodia lehkhathawnah chuan tarlan a ni bawk.
Delhi CM Arvind Kejriwal kar li chhunga pawis a chawi tur pe tura tih chuan, “Ram hian Prime Minister lehkhathiam dan hriat hi a right a ni lo em ni? Court-ah a degree neih te pholan nasa takin an dodal a, eng vang nge? PM degree enfiah dil te chu pawisa chawitir an ni a? Eng nge maw thleng mek le? Lehkhathiam lo emaw lehkha zirsang lo PM chu ram tan hian a hlauhawm a ni,” tiin a sawi bawk.
CBI te chuan February 26 khan Sisodia chu tuna hnawl tak Delhi Excise Policy 2021-22 siam leh kalpui danah dik lo taka thiltih a awm tiin an man a, tum tam tak thu zawhfiahin a awm tawh bawk.
March 31 khan trial court chuan Sisodia-an bail a dilna chu hawlsak lehin a lan danah thil sual tiha mawhphurtu a ni a ti a, Sisodia hi criminal conspiracy thilah advance kickback Rs 90-100 crore vel vaivirna vela inhnamhnawiha puhin a awm mek a ni.