Restricted tender vangin mi tlemte chauh kutah sum hman sen loh lut

Mizoram state budget a pun zel laiin, mi tlemte chauh kutah sum hman sen loh a lut leh health care kalpui dan fuh lohah phai lama sum tam tak a luanchhuah avangin mipui nawlpuiah sum lut leh state chhung sum lengvak a tlem phah tih Congress hruaitu Lalnunmawia Chuaungo chuan a sawi.
Zirtawpnia Congress Bhavan-a inkhawmah MPCC senior vice president Lalnunmawia Chuaungo chuan, kum 9 kalta chhunga Mizoram budget pun chu a let hnih aia tam a ni tawh a, heti chunga mipui nawlpui kuta sum hman tur a vang ta hian chhan lianpui a nei a. Kan sawrkar hrawn mekin ‘economic policy’ rintlak a neih loh vang leh sum ruahman leh hman chungchanga a hlawhchham nasat vang a ni tih a sawi.
PWD hnuaiah class I contractor 158, class II 228, class III 168, class IV 1070 leh class V 25, a vaiin 1649 an awm laiin, kan sawrkar hrawn mek hian restricted tender lem hmangin PWD hnuaiah contract hna 207 a pe tawh a, departmental work lem hmangin hna 689 a thawk tawh bawk a. Mizoram sawrkar hnuaia works department dang – PHE, P&E leh non-works department zawng zawng belhkhawm phei chu pui tak tur a ni, tiin, PWD hnuaia in-register contractor 1649 awm chung a, duhsak zawngte contract hna inpek tawp tawpna restricted tender lem leh departmental work lem an uar em em tih a sawi a ni.
“Hna lian deuh deuh phei chu an sum siampui tura an ruat mitlemte hnenah an pe tlut tlut a. Mi tlemte chauh kuta an hman sen loh sum an luhtir tawk tawk laiin, mipui nawlpuiin kan hman tur sum kan kutah a lut si lo. Hetiang taka sawrkar sum mipui kuta a tlak rual loh avang hian, mipui nawlpuiin sum hman tur kan nei loa, pawisa a vang tih chu kan dawrkaite auhla a ni ta. Restricted tender chu tul bikte tih lohah chuan hman a ni loang, titu chief minister chuan, a mal mala pek sen loh restricted tender tam lutuk blanket approval a pe ta hial zawk a ni,” Lalnunmawia Chuaungo hian a ti.
Health care (MUHCS) kalpui dik lo vangin Mizoram mipui sum chhiar sen loh vairamah a luangral a, hei hi state chhunga sum lengvak tlem chhan zinga pakhat a ni tel tih sawiin, “Kan sawrkar hi state economy chungchanga ruahmanna siam thiam lo, a ngaihna hre lo a ni tih a lang zel. India rama state tinin an state chhunga thil siam leh thawh chhuah tana duhsak bikna policy an neih kalh chiahin an ti a. Chu chuan kan state-a hna thar siam, state chhunga sum virvel ti tam tur nasa takin a pawt chhia a. Kan thalaite hna thar siam kawngah, state chhunga sum lengvel tihpun kawngah a ni lo zawngin nghawng a nei ta a ni,” a ti.
Tuna kan buaina chu thalaiten an hna hmuh, an thawh theih awm tawk thawh tur an nei lo hi, a ni tiin, Congress party-in ram rorelna fawng a vawn leh hunah chuan economic policy tha zawk leh mipui nawlpuiin an hlawkpui tur ruahmanna tha an kalpui dawn tih MPCC hruaitu hian a sawi.