Philippines lawng kanga thi mi 76 tling tawh
Philippines lawng kanga thi mi 76 tling tawh
Philippine Coast Guard chuan Nilaini kal taa lawng kang chhe ta atangin ruang 41 an la chhuak tih sawiin heng mite nen hian he chhiatna thlenga thi chu mi 76 an ni ta.
Mi 130 chuang chuanna MV June Aster hi Manila atanga chhuak niin an thlen tumna, khualzin tlawh thin hmun, Coron an thlen hma lawkin tuipuiah a kang vak a ni.
Coast guard chuan Inrinni khan dam chhuak mi 43 an awm thu leh eng emaw zat chu damdawi ina enkawl an la ni tih an sawi a, chin hriat loh mi 13 an la awm mek bawk tih an sawi.
Ruang lak chhuah hi a khu him lo (toxic) avang leh a sat lutuk avangin tih lawk theih a ni lo va, thuneituten Zirtawpni thleng khan lawnga la luh hi an la phal lo a ni.
Philippine Coast Guard hotu, Geronimo Tuvilla-a chuan tuna an ngaih pawimawh ber chu ruang an hmuh chhuah tawhte tute nge an nih hriat tum leh kangmei a chhuah chhan hriat tum a nih thu a sawi.
Coron-a tourism thuneitu, Kristine Ablana-i chuan thi chhungte chuan ruang hmuh tawhte thil neih atanga finfiah tura DNA test tih turin an ngen hlawm tih a sawi.
“Thenkhat chu an thlalak leh an bungrua leh an thawmhnaw inbel atangin an chhungten an hre nghal thei a, a bak hi DNA sample laka finfiah ngei an duh a ni,” a ti.
Coast Guard thupuangtu, Commodore Noemie Cayabyab-i chuan kangmei hi bungraw dahna hmun atanga intan a ni a, hmun dangah a kang kai zui niin a sawi.
Dam chhuakte hian thil puak ring tak pawh an hria tih an sawi niin a sawi a, ‘meikhu lo lang hmasain a kang zui ta a, rang takin a inman kai zui ta a ni’ tih a sawi a. Lawng atanga him tuma zuang chhuakte tan pawh lifejacket hakna hman awm miah lovin a kang hi a darh chak niin a sawi.
Rescue boat hmanga chhanchhuah pakhat chuan kangmei a chhuah tirh hian mangang au thawm a hria a, tlanchhe hovin an paltlu zui a, an chil nawk nawk niin BBC a hrilh.
Lawng hi kum 2002-a sak kha niin safety certificate nung a nei a, March thla khan enforcement inspection pawh a paltlang a; mahse, chhuitute chuan zin chhuah phalna nei tur hian dik lova tih a awm theih an ring a, bungraw hlan dan te, thawktuten rikrum a thlena an hmachhawn danah te pawh rinhlelh a awm thei niin Palawan Daily chuan a tar lang.
Lawngah hian passenger 117 leh thawktu 17 an chuang a ni.
Lawng enkawltu, Atienza Interisland Ferries chuan chhiatna thleng chhui hna thawhnaah thuneitute puih zel an tiam.