Ukraine-Poland ramria rel beihnaah UK PM hlui tel teuh

Ukraine-Poland ramria rel
beihnaah UK PM hlui tel teuh
Russian drone-in Ukraine-Poland ramri bul lawk a fuh a, a hma chiah hian UK prime minister hlui, Boris Johnson-a leh European venhimnaa thuneitute an kaltlang.
Pathianni tuka Yahodyn-a rel khawlpui kah fuhnaah hian tumah hliam an awm lo va. Passenger-te chu him taka chhuahtir n ni tih Ukrainian thuneituten an sawi.
Johnson-a leh European national security adviser rualte hian Kyiv-a conference an hmang zo haw lam chu rel dangin he kawng chiah hi an zawh liam chiah a ni.
Russia chuan Ukraine khawthlang lamah ‘rel kawng’ an beih thu an sawi a, Ukraine-a sorkar railway company Ukrzaliznytsia chuan ‘beihna hian palaite chuanna rel a tum a ni thei’ tih an sawi.
Beih a nih laia Yahodyn station-a rel danga chuang, CIA chief hlui, David Petraeus-a chuan ‘a rapthlak hle’ tih a sawi a. New York Times-in an kawmnaah, “Hruaitu nunrawng takin Ukrainian civil mite tihthaih a tumna a ni,” a ti bawk.
Ukrzaliznytsia chuan palaite rel hian ‘Russian-te beihna thleng mai thei hlauhthawnna avangin ruahman lawk aia hmain station a chhuahsan’ tih an sawi.
Rel kah fuha chuangte pawh hi jet-propelled drone hmanga a fuh hma ‘minute 15 chhung chauh’ insaseng tura hun pek hman an ni tih a sawi.
Ukrainian leh Polish thuneitute chuan Russian drone hian Polish ramri atanga km 2-a hla a fuh tih an sawi.
Kyiv-a zin ve, Swedish prime minister hlui, Carl Bildt-a chuan BBC hnenah rela chuangte chu insaseng tura inbuatsaih tura tih hnu lawkah an kal zui phalsak an ni tih a sawi.
Rel hi him takin Poland-a ramri station, Dorohusk a thleng a ni.
Bildt-a hi Johnson-a chuanna relah tho a chuang nia sawi a awm a; mahse, UK prime minister hlui hian engmah a la sawi lo.
X-ah, “Putin-a hian tukina Polish ramria kan chuanna rel kha bei ta mai nge a nih ka hre lo. Hetiang hi ni tin Ukrainian-ten an tawrh thin a ni a, Kyiv thawhpuite hian Ukrainian-te hi an mamawh ang air defence an pek thuai a ngai a ni,” tiin Johnson-ah hian a tar lang.
Ukraine hian an thawhpui ram, a bikin US chu ni tina Russia-in a beihna lo dan nan a lo kah thlakna hmanrua pe turin a dil fo tawh thin.
Polish Prime Minister Donald Tusk-a chuan an ramri bul laia thil thleng avang hian emergency meeting a ko nghal a. “Russian-ten boruak tha lo an siam hian kan ramri a hnaih hret hret zel a ni,” a ti.
Johnson-a leh European security adviser-te hi Kyiv-a Yalta European Strategy (YES) conference-a tel an ni a, hetah hian politic, sumdawnna, venhimna leh mass media chungchangte an sawiho a ni.
Russia hian indona kal mekah Ukraine-a rel, relkawng, petrol station leh ramri kânna hmunte a bei nasa hle.
Kar liam ta tir lamah pawh khan Russian drone-in Ukraine leh Moldova inkalpawhna a fuhah mi pahnih an thi tih Ukrainian President Volodymyr Zelensky-a’n a sawi.
Kar hmasa vek khan Ukraine chhim lamah Russian drone-in passenger phur rel a beihnaah conductor hmeichhia a thi a. Thla tir khan Kyiv-a rel station beihnaah Ukrzaliznytsia-a thawk paruk an thi bawk.
Russian beihna avang hian Ukraine-a rel kawng tam tak a chhia a, kum 2022-a Russia-in a rûn atangin thlawhna a thlawh theih loh avangin rel hi mite inkalpawhna ber a ni.