Indonesia lawng pila chuang mi 129 zawn hna thawk ngawrh
Indonesia lawng pila chuang mi 129 zawn hna thawk ngawrh
Coastguard telin chhanchhuah hna thawktu za telin Java Sea-a Indonesian passenger phur lawng pila chuang mi 129-te zawn hna chu ngawrh takin an thawk zel tih thuneituten Thawhtanni khan an sawi.
National Search & Rescue Agency (Basarnas) hian Pathiannia lawng chesualah hian thawktuten mi 108 an chhanchhuak a, paruk vel thi an awm tih an sawi.
Virgo Transport 8 hian Java thliarkara Surabaya atangin mi 243 phurin Borneo-a lawng chawlhna khawpui, Banjarmasin a pan a, khaw chhe tak hnuaia an kal laiin biakpawh theih a ni lo zui niin Basarnas chuan a sawi.
“Thawhtanni vartian atangin chin hriat lohte zawn hna thawh chhunzawm lehnghal a ni a. Lawng 12 vel nen thawktu 622 an bung mek,” tiin Banjarmasin rescue agency hotu, I Putu Sudayana-a chuan Reuters a hrilh.
Tui phul nasa, fawn sang leh thli na tak tlehin hna a tisawt lo hle niin national rescue agency chief Mohammad Syafii-a chuan a sawi bawk.
“Tui chhunga lut thiam bikte nen kan thawk chhuak a; mahse, khaw awm dan hian a zir loh em avangin chet chak a harsa hle,” a ti.
Lawng pilna hi Banjarmasin, Arianto Ardi-a Trisakti Port command centre atanga tuipui km 150 vela hla niin rescue agency-a hotu dang pakhat chuan Reuters a hrilh bawk.
“Thli a tam a, lawng pawh thunun a harsa em em a ni,” a ti.
Rescue agency-in video an tihchhuahah chuan lawng lian tak, a sen leh a dum hi tuipui pawl phutah a let a lang a, a rawng sen, tuiin a chim chin pawh hmuh theih a ni bawk.
Lawngleng pahnih, mi phur ve thei chu lawng let reng bulah hian tui fawn nasa tak karah a kal kual vel bawk.
Pathianni khan national rescue agency-a hotu dang, Edy Prakoso-a chuan lawng hi tui fawn nasa takah khan a pang lehlamah a rihna a kal nasa lutuk niin a sawi.
A chunga thlawk helicopter-in a leh thu hi a sawi niin Transport Minister Dudy Purwagandhi chuan Pathianni khan a sawi a, a chhan erawh hriat a la ni lo va, chhui mek a ni tih a sawi.
Lawng hi mi 500 chuan theihna a ni a, mihring a phur tam lo.
Indonesia hi thliarkar 17,000 vel awm khawm niin inkalpawh nan lawng an hmang nasa a, a man a tlawm bakah thlawhna aiin a awlsam zawk a, chhiatna pawh a thleng fo thin.
Thla hmasa maiah khan Madura Island-a lawng kangah mi panga an thi a, khualzin tamna, Bali thliarkar atanga zin chhuaka kangmei chhuakah pakhat a thi bawk.