CM’s Special Package leh a behbawm…

CM’s Special Package Phase-II chu nimin khan semchhuah a ni a. He chanchin buatsaih laia nimina sawrkar thuchhuah atanga hriat theih chinah district pali – Aizawl, Kolasib, Serchhip leh Lawngtlaiah te belhkhawmin mi 1180 hnenah cheng nuai 590 semchhuah a ni.
CM’s Special Package Phase-I hnuaia sum semchhuah kan hriat theih chin chu mi 479 hnennah cheng nuaikhat theuh, tih a ni a. Hei hi kumin kum tir lam February thlaa budget session-a chief minister-in zawhna a chhanna a ni. Mi pakhat hnenah cheng nuaikhat theuh a nih chuan sum semchhuah hi cheng nuai 479 tihna a ni. Phase-II ah hi chuan mi pakhat tan cheng singnga tih a ni tawh.
Phase-II hnuaia district pali-a sum semchhuah tun maia kan hriat chin cheng nuai 590 leh Phase-I a sum semchhuah tawh nuai 479 hi a vaiin cheng nuai 1,069 (10.69 Cr) tihna a ni. District dang pasarih-a CM’s Special Package Phase-II la sem chhuah tur zat hi hriat la ni lo mah se, cheng nuai 600 bawr vel turah ngai (hypothetical) ta ila, CM’s Special Package Phase-I&II atan hian a lo berah cheng nuai 1500 (15Cr) chuang a ral dawn tihna a ni. Term khat chhunga kum hnih lo la awm leh turah hian Phase engzat nge awm leh dawn hriat a ni lo.
CM’s Special Package hi Bana Kaih scheme hnuaia awm a ni a, pawisa fai hi a dawngtute bank account-ah direct-a transfer a ni a, rulh ngai lo, tanpuina liau liau a ni. A dawngtute hi eng emaw ber eizawnna bul lo tan tawh, tanpui ngai nia an hriat te a ni a. Pawisate hi a ni lo zawnga an hmang a nih chuan lak letsak emaw bungraw laksak emawa hrem theih an ni.
Kan hriat angin, sawrkar hmasa Congress leh MNF te khan NLUP leh SEDP kha flagship programme angin an kalpui a. Congress hun chhung khan NLUP atan cheng vbch 1,300-1,600 vel seng anga chhut theih a ni ang a. MNF hun chhung khan cheng vbch 450 vel chu SEDP atan khan senral hman nia ngaih theih a ni bawk awm e. A zat hi ‘vel’ tih bakin a chiah chiah sawi theih a ni lo. A hming chu enga pawh lo ni se, tum (goal) tha tak nei chunga ‘pawisa sem’ a ni ber awm e. Bana Kaih scheme hnuaia CM’s Special Package pawh hi ‘pawisa sem’ tia sawi theih tho a ni.
Kan ram inrelbawl dan ‘politics’ hi hla tak atangin enhlatna telescope hmangin han thlir ila, UT kan nih atanga tun hun thleng hi hmuh theih ta se, kan hmuh tur langsar ber chu – pawisa sema politician-te hmanhlel em em lai a nih a rinawm ta ber.
Kan ram politician-te hian pawisa sem bak thiam dang an nei lo em ni? tiin zawhna siam ni ta se, politician-te tan chuan a dengkhawng hle ang a, an thin pawh a rim viau ang a, thinrim viau pawh ni se, a mawh hran lovang. A chhan chu, thiam dang an nei a, kha leh chen kha Mizoram an lo enkawl a, hmasawnna tam tak an thawkchhuak ve bawk alawm maw le, a tih ve theih tlat! Mahse, mihring tlemtê ei leh bara intodelhtir thei lo leh kawngpui tha pawh siam thei bawk si lo, tih chu zawhna zawttute rilru a nih a rinawm.