Canada-in kuminah India nen CEPA tihfel theih beisei

On Sep 21, 2026 0 0

Canada chuan India nena comprehensive economic partnership agreement (CEPA) siam chu kumin kum tawpah an tihfel hman a beisei tih an ram international trade minister-in a sawi.
Canadian Prime Minister Mark Carney-a pawhin March thlaa New Delhi a tlawh tum khan ram pahnihte hian kum tawpah chuan free trade agreement (FTA) an siam theih a rinawm thu a lo sawi tawh bawk.
“Thla rei lo te hnuah kan tihfel theih ngei ka beisei a, ka ring a ni,” tiin Canadian Trade Minister Maninder Sidhu-a chuan Inrinni khan India-a sumdawnna khawpui, Mumbai a tlawhnaa Reuters-⁠in an kawmnaah a sawi.
Indian sumdawng palaite chuan thla tharah Canada an tlawh rin a ni a, ram pahnih hruaitute pawh December thlaa G-20 Summit-ah an inkawm a beiseiawm bawk tih Sidhu-a chuan a sawi.
Sumdawnna thila India leh Canada inremna tura sawiho pawimawh ber pakhat chu energy sector a ni a. Canada-ah hian nikum khan Shell hnuaiah LNG thawn chhuahna hmunpui hawn a ni a, hetiang hi a tahtawlin panga dang siam leh tuma hmalakna a awm mek bawk.
“Heng hmalakna turah hian Indian firm-te an tel ve theihna tura indawr mek a ni a; mahse, an inrawlha him taka heng thila an awm ve theihna tur eng nge ni ang tih ngaihtuah mek a ni,” tiin Sidhu-a chuan a sawi a. Hmalak zui dan tur erawh a sawi duh rih lo thung.
Liquefied natural gas bakah hian ram pahnihte hi nuclear energy-a thawhhona huang zauh dan an dap bawk a, India hian tam zawk siam chhuah theih a duh a ni.
“Canada hian nuclear industry-ah thui tak kawng a lo zawh tawh a, India-a thawn luhin Canadian company leh industry-te hlawkpui theih dan tur kawng pawh ka hmu a ni,” tiin Sidhu-a chuan a sawi.
Sidhu-a hian Indian sumdawng lian tak tak – Reliance Industries, Mahindra & Mahindra leh JSW Group thlengin Canada-a ram leilung hausakna pawimawh bik hai chhuahnaa sum thawh dan an dap hlawm tih a sawi bawk a, chiang erawhin a sawi lo thung.
Company-te hian thawhhona siama sum thawh vein India-a lak luh leh hmun danga pek chhuahna kawnga tel ve dan an dap niin Sidhu-a hian a sawi a ni.