Siami leh a pawlte rah chin apiang an ram a la ni!

Pool B lama an match thumnaah nimin khan Lalremsiami leh Lalthantluangi telna India women’s hockey team chuan 20-1 tehrengin Thailand nulate an sawp leh a, Siami’n goal khat a thawh ve bawk.
Indian drag-flicker Deepika Sehrawat chuan he inkhelah hian penalty corner atang vekin goal kua zet a khung a, Asian Games history thar siamin, he Games hmeichhe hockey game khata goal thun hnem ber a ni.
Deepika hian an pool match hmasa pahnihah goal 11 khawl tling tawh bawkin, Uzbekistan lakah goal riat leh Indonesia lakah goal thum a lo ngah tawh a ni.
Thailand laka India tana goal khungtute chu Deepika (2nd, 8th, 9th, 24th, 33rd, 36th, 39th, 51st & 57th minutes) bakah Navneet Kaur (4th, 29th, 35th & 51st), Rutuja Dadaso Pisal (10th, 11th & 47th), Neha Goyal (19th), Lalremsiami (26th), Sakshi Rana (29th) leh skipper Salima Tete (45th)-te an ni.
Thailand consolation goal hi penalty corner atanga Supansa Samanso (57th) tihluh a ni thung.
India hi a zawnin an pool-ah match thum an chak zawn tling ta a, naktuk, Zirtawpni hian a thlengtu Japan an tum leh dawn a, hei hi India nulate tan fiahna hmasaber a ni ang.
India hian Pool B standing-ah hma an hruai mek a; pool tina top team-te theuh hian team 12 intihsiakna competition kal mekah semi-final an lut dawn a ni.
Indian nulate hian Netherlands leh Belgium inthlentawm kumin FIH World Cup-ah khan pangana dinhmun hauhin, Asian Games kal mekah hian champion tura rinkai zingah an tel a, an game hmasa pahnihah Uzbekistan (19-0) leh Indonesia (17-1) an lo sawp hle tawh bawk.