Table chung berah Aizawl FC an kir

Ningani zan khan UEFA Nations League 2026 – 27 khelh chhunzawm a ni a, captain Cristiano Ronaldo tel lova inlan Portugal chuan mikhual an nihna hmunah 4-2 in Denmark an hneh. Inkhel dangah Wales chuan Norway an hneh ve bawk.
Captain Cristiano Ronaldo a haw tauh vanga boruak nuam lo takin a chenchilh mek Portugal hi Denmark hmachhawn turin Parken Stadium, Copenhagen-ah an leng lut. Mikhual an nihna hmunah bul an tan tha a, goal pawh an thun hma hle. Inkhel tan atanga minute 13-na lekah defender João Cancelo chuan hmahruaina goal a thun nghal.
An mualah goal an chhuah hnuin Denmark an insiamtha a, na takin an mikhualte an nawr let. Denmark tan hian Mikkel Damsgaard chuan minute 23-naah goal thunin an si phurh a sut. An si phurh an sut vangin Denmark phur viau mah se an phur rei lo hle. Goal an thun atanga minute hnih em pawh a liam hmain goal an chhuah zui leh nghal. Portugal tan hian Gonçalo Ramos chuan minute 25-naah hma an hruai nawn lehna goal a thun a, he goal hmang hian 2-1 a hmahruai chungin chawlhlawk an hmang.
Chawlhlawk hnu lamah mualneitu Denmark an che fuh hmasa a, Rasmus Højlund chuan minute 53-na lekah goal thunin an si phurh a sut a, 2-2 a ni leh ta chiah. Hojlund goal thun hial Portugal a chhaihkawlh sauh thung a, goal hnih ngawtin an khingpuite an chhanglet leh a, mikhual an nihna hmunah hnehna an chang.
Portugal tan hian midfielder pawimawh Vitinha chuan minute 67-naah hma an hruai let lehna goal a thun a. Hun tawp dawn hnaih minute 87-naah João Félix chuan an goal lina thunin, an chakna a nemnghet. Felix hi manager thar Jorge Jesus hnuaiah a chetha viau a, goal a thun tlung zel. Jesus hnuaiah hian vawi thum khel tawhin goal a la thun vek a, Portugal innghahna lian a ni mek a ni. Manager thar Jesus hnuaiah Felix a vul laiin Cristiano Ronaldo erawh chuan hun duhawm lo tak a tawng ve thung a. Kum 41 mi Ronaldo hi a tum aia hmaa international football chawlhsan thei dinhmunah a ding mek.
League A, Group 4 a inkhel dangah Wales chuan an mikhual Wales chu 2-1 in an hneh a, point thum hlu tak an hmu ve bawk.
Wales hian Cardiff City Stadium-a an mikhual Norway lakah bul an tan tha lova, goal an chhuah hma hle. Norway tan hian inkhel tam atanga minute 11-na lekah Oscar Bobb chuan hmahruaina goal a thun nghal. Hma takah goal thun nghal mai mah se Norway in goal an thun belh thei lova, Wales hian rin loh takin Erling Haaland meuh pawh goal thun lovin an tlang tluan thei.
Hma taka goal an chhuah hnuin Wales tan Daniel James chuan minute 38-naah goal thunin an si phurh a sut. Second half-a tam zawk an nih hnu lawkah Wales tan Neco Williams chuan goal a thun belh zui leh a, Norway lakah an chak zui ta a ni.