World Champion Spain an chak vek

On Oct 5, 2026 0 0

Inrinni zan khan UEFA Nations League khelh chhunzawm a ni a, World Champion Spain khel tha chunzawm zelin vawi thum an chak zawn tawh. Group 3 a inkhel dangah England in Croatia chu 7-0 ngawtin an sawp ve bawk.
Spain 3-0 Czech Republic
World Cup leh Euro a champion kawp mek Spain hian Estadio Carlos Tartiere ah an group a chak la nei lo Czechia an mikhual. An mikhual lakah bul an tan tha viau a, Nations League goal thun thei tak Lamine Yamal chuan inkhel tan atanga minute 6-na lekah hmahruaina goal a thun nghal. Yamal hi Spain tan a khel tha tluang viau a, Nations League-ah vawi thum khelin goal li a thun der tawh.
Hma takah goal an thun hnuin Spain tan hian Captain Rodri chuan minute 35-naah an goal hnihna a thun a, an hmahruaina a tizau. 2-0 a hma an hruai reng hnuin Czechia tan Jiri Sláma chuan minute 69-naah goal thunin an si phurh a sut then. Spain lakah goal an thun vangin phur thar hluai mahse an phur rei lo. Minute 85-naah Ladislav Krejcí hnawhchhuah a ni. Tlem zawk an nih hnuah goal an chhuah zui thuai a, Spain tan Mikel Merino chuan minute 89-naah an goal thumna thunin a tawp a khar.
Czechia hnehtu Spain hian Nations League-ah bul an tan tha viau a. England leh Croata te an hneh tawh bawk a, vawi thum chak zawnin Group 3-ah hma an hruai mek. Thawhleh zan hian Croatia an hmachhawn zui leh nghal ang a, mikhual an nihna hmunah an chak a nih chuan khelh hmabak pahnih nei chungin quarter-final an lut ang. Spain hian World Cup 2026-a an bul tan naah Cape Verde an inhnehtawkpui ringawt a. Hemi hnu hian an chak vek thung a, khelh 10 an chak zawn ta hial ni.
England 7-0 Croatia
Inrinni zana inkhel dangah Croatia chu an mualah ngei an mualpho a, an mikhual England in 7-0 ngawtin an sawp. England tan hian Harry Kane leh Bukayo Saka ten goal hnih ve ve an thun.
England hian mikhual an nihna hmun Stadion HNK Rijeka ah bul an tan tha viau a, inkhel tan atanga minute 8-na lekah Captain Harry Kane chuan hmahruaina goal a thun nghal. Hma taka goal an thun hnuin Jude Bellingham, Anthony Gordon leh Bukayo Saka ten goal an thun belh a, 4-0 a hmahruai chungin chawlhlawk an hmang.
Chawlhlawk hnu hnu lamah England an khel tha chhunzawm a, goal hmahruai thuntu Kane chuan bul tan lehin minute 53-naahan goal ngana a thun a, minute 68-naah Saka-a’n a goal hnihna a thun hnuin Morgan Rogers chuan minute 87-naah an goal sarihna thunin a tawp a khar. England hian mikhual an nihna hmunah awlsam takin hnehna an chang zui ta a ni.