Gandhi unau leh MP dang lakah FIR ziak lut

Delhi Police chuan complaint an dawn angin Congress hruaitu, Rahul Gandhi leh Priyanka Gandhi Vadra bakah MP eng emaw zat lakah FIR an ziak lut.
Thawhlehnia New Delhi-a Congress kaihhruaia Chief Election Commissioner (CEC) Gyanesh Kumar-a bâng tura kawng zawhnaah heng mite hi phalna nei hmasa lova Akashvani Bhavan hung chhung an luh avangin an lakah hian thubuai ziah luh a ni.
Complaint-ah hian eptu hruaituite hi Election Commission of India (ECI) pisapuia luh tuma kawng an zawh police-in an dan hnuah Akashvavi Bhavan hung chhungah hian phalna nei hmasa lovin an lut niin FIR ziah luh chungchang hria officer chuan a sawi.
“Section hrang hrang tlawhchhanin FIR ziah luh phawt a ni a, chhui zui zel a ni ang,” tiin police officer chuan a sawi.
Thawhlehni khan eptu MP 300 vel chuan Kumar-a bân phutin parliament atangin ECI pisapui, Nirvachan Sadan panin kawng an zawh a. Police-in ECI hmunpui pawnah lo dangin an zinga mi 250 chuang an man nghe nghe.
Police nena an innawr buai deuh hnuah Gandhi, Vadra-i leh eptu hruaitu 20 vel chu Akashvani Bhavan hung chhung, Nirvachan Sadan bul chiahah hian an lut a, zan dar 08:00 vel thleng an awm a ni.
Eptu hruaitute hi man zui an ni a, video leh thlalak darhah chuan police thahnem takin Gandhi-a hi bawrin bus-ah an nawr lut a. Congress chuan Gandhi-a bakah hian an party general secretary, KC Venugopal-a leh hruaitu dang eng emaw zat chu nasa taka pawt leh nawrin bus-ah an nawr lut niin an sawi.
Hruaitu mante hi Kingsway Camp-ah hruai phawt an ni a, zan dar 10:15 velah chhuahtir leh an ni.
A tukah Akashvani Bhavan hung chhunga an luh avangin an lakah FIR ziah luh zui a ni ta a. Eng dan section tlawhchhanin nge thubuai an siamsak tih leh tute hming nge complaint thehluhah hian lang tih erawh hriat mai theih a ni rih lo.
Police officer pakhat, innawrna leh Kumar-a bân phutna kawng zawh buaipuitu zinga mi chuan Congress worker thenkhatin New Police Lines huam chhunga an hungna lawn liam an tum bawk niin a sawi.
Thawhlehnia eptu MP-ten kawng an zawh hi tun hnaia Kumar-a’n electoral roll ennawnnaa thil dik tawk lo a ti nia sawi awm leh BJP tana hlawhpui theih tura thil ti, lai lo taka thil kalpuia an puhna avanga bâng tura an nawrna pakhat a ni.
BJP chuan an puhna hi hnawlin Congress party kaihhruaia eptuten CEC an bei chiam chu an sawisel ve thung.