Mi 200 chuang kutchhuak lehkhabu

Vanapa Hall bathlarah Lehkhabu Pho Runpui an buatsaih mek a, ngaihhlut a hlawh hle. Mi 200 chuang kutchhuak an pho a, Mizo lehkhabu lar tak tak a awm.
Mi 200 chuang kutchhuak lehkhabu han tih hian, lehkha chi hrang hrang 200 chuang an pho tihna a ni lo a, writer pakhatin lehkhabu panga paruk te an ziah avangin a lehkhabu ang zawng chuan sang chuang daih a ni ang. Writer pakhat kutchhuak 10 chuang te pawh a awm.
Hranghlui JF Laldailova kutchhuak te, Zikpuii Pa kutchhuak te, 70s vela Mizo lehkhabu lar a awm a, chung aia hma, Mizo lehkhabu hmasa pawl tak te pawh a awm. Lalzuithanga kutchhuak te, Biakliana kutchhuak te, C |huamluaia kutchhuak te a awm a, tunlai lehkhabu lar a awm bawk.
Mizo Writers Association buatsaih Lehkhabu Pho Runpui-ah hian a tam ber chu Mizo tawng lehkhabu a ni a, English-a ziahin a dawt. Hindi-a ziah leh kawl (Burmese) tawnga ziah a awm bawk.
Mizoram hmun hrang hranga mite kutchhuak a ni a, Mizoram pawna chengte kutchhuak pawh a awm. Lehkhabu hi chi hrang hrang a awm a, a inpawlh tha hle.
Kar hmasa Zirtawpni khan an tan a, a ni khatnaah tlawhtu an thahnem nghal. A hawn ni-ah hian lehkhabu Rs 2,07,850 man an hralh a, ni khata hralah chuan hei hi lawm tak zetna tham a tling ang. Lehkhabu Pho Runpui hi a vawi rukna a ni a, nikum khan a hawn ni-ah Rs 1,69,588 man an hralh. A inthlauhna hi Rs 38,262 a tling. A ni hnihna, Inrinni-ah a tam leh zual a, lehkhabu Rs 2,25,137 man an hralh.
A buaipuitute sawi danin, a tuk Inrinni-ah pawh mi an thahnem a, sikul naupang a huhova kalte pawh an awm. Kuminah an thlen chinah nu leh pa aiin thalai an tam zawk tih an sawi.
Lehkhabu Pho Runpui hian kum dangah pawh ngaihhlut a hlawh thin a, sikul thenkhat chuan an zirlaite a huhovin an kaltir thin.
A hmunah Mizo writer larte an awm thin avangin an lehkhabu leia an hming sign-tir tuma kal te pawh an awm thin.