Loneitu chawimawi zingah Mizonu

Sawrkar laipui Ministry of Agriculture & Farmers Welfare-in kumtin October 15-a a hman thin ‘Mahila Kisan Diwas’ New Delhi-a neihah Mizoram atangin Serchhip P&E Veng B Lalthuami chuan chawimawina a dawng.
‘International Year of Woman Farmer 2026’ denchhenin India ram pumah ‘Mahila Kisan Diwas’ hi kuminah uar lehzuala hman niin, India ram state hrang hranga loneitu hmeichhe entawntlak mi 30 thlan an ni a. Mizoram atangin B Lalthuami chu he chawimawina dawng tur hian thlan a ni.
Lo neih, huan thlai siam leh ran vulh kawngah sulhnu tha tak neiin, self help group kaltlanga hmeichhe loneitu dangte kaihhruai leh zirtir kawngah a thawhhlawk hle bawk. A hnathawh hi state chhung mai bakah ram pum huapa entawntlak a nih avangin he chawimawina dawng tura thlan a ni.
Hetihlai hian, United Nations hnuaia Food and Agriculture Organisation (FAO) in ‘100 Women Heroes in Agri Food Systems and Rural Development’ chawimawina dawng tura a thlan – ZT Lalrithangi, Sangau Lawngtlai district chuan, chawimawina an semna Rome Italy atangin October 18 khan Mizoram a lo thleng a. Vawiin – October 19 hian Horticulture department chuan an minister C Lalsawivunga hoin lawmpuina an buatsaih dawn.
ZT Lalrithangi hian kum 2024 atang khan strawberry tiak 1000 nen bul tanin tunah chuan hectare 2.5 a zauah kung 10000 chuang a phun tawh. FAO-in khawvel ram 131-a hmeichhe farmer hlawhtling a thlanchhuah zingah telin, India ram atangin a ni bakah hmeichhe dang pakhat a tel.