Damlohna thila vengtu bumin tang 17 tlan chhua

Damlohna thila vengtu bumin Tamil Nadu-a lung in tang 17 an tlan chhuak a, mi pali man leh nghal niin mi dang zawn zui mek a ni.
Tamil Nadu-a kum 1995 hnua tang tlan chhuahna lian ber hi Thekkampatti jail, Theni district-a Thawhtanni zan tlai tawh taka thleng a ni a. Police chuan man bakte man tumin ngawrh takin an zawng a, an thenawma Kerala nen an inkalpawhna pawh an thlithlai uluk hle.
Tun tum lung in tlan chhuah hi kum 1995-a LTTE hel 43-te Vellore Fort chhunga special detention camp-a an tanna atanga lei verh metre 47 atanga an chhuah hnua a lian ber a ni.
Vijayendra Bidari, Inspector General of Police, South Zone chuan zawng turin special team 17 an siam tih a sawi a, Theni SP K S Praveen Gowtham-a’n tan in hi a tlawh tawh bawk.
Police team hian ramhnuai, rel kawng leh lirtheite Theni leh a chhehvel district-ah an dap ngawrh hle a. Kerala panna kawngpui hmun eng emaw zatah checkpoint an siam bawk.
Tang tlan chhuakte hi an vaiin Madurai-a mite niin pindan (cell) pakhata mite an ni a. Thawhtanni zan khan an zinga pakhat chu a phungzawl thut angin an sawi a, prison officer-in an cell a luh chuan lo beiin lung in luhna pui ber atangin an tlan chhuak zui a ni.
Officer hian a lu-ah hliam tuarin G Vilakku-a sorkar damdawi inah dah a ni a. Vengtu dang pahnih pawhin hliam tenau an tuar bawk tih police-in an sawi.
Damlo awm thut anga an sawi leh an luhna pui ber atanga an tlan chhuak zui theih dan hi chhui zui mek a ni.
Tlan chhuakte hi engvanga lung in tang nge an nih hriat a ni rih lo.
Kandamanur Police-ten thubuai an ziak lut a, police hotute leh lung in vengtute pawh thu zawh fiah hmabak an ni.
Thekkampatti lung inah hian district hrang hrang atangin tang 500 chuang an awm a ni.