Israel-in West Bank-ah dan a bawhchhe nasa – UN

UN hnuaia chhuitute chuan West Bank-ah Israel-in ‘nuai chimih a tumna’ nen mihringte laka tih loh tur thil a ti niin an sawi.
UN Independent International Commission of Inquiry on the Occupied Palestinian Territory hian Thawhtanni khan Israeli sorkar leh a sipaite chu Palestinian-te awmna ram chinah indonaah dan an bawhchhe nasa niin an sawi a, heng zingah mi sawisak, pawngsual leh mipat hmeichhiat hawia tharum thawhna pawh a tel.
Chhuituten an chhuina an tlangzarh mek lai hian Israeli sipaite hian kar hmasaa Hebron-a silaia mi an kah hnuah mi chengte hnawh chhuah leh an chenna vuak chhiat an kalpui mek.
Commission hi UN aiawh an ni chiah lo va, September, 2025 pawh khan report an siamah Hamas-ten October 7, 2023-a Israel an beih hnua Israel-in Gaza a beihnaah ‘mi chengte suatna’ a kalpui niin an lo sawi tawh a, Tel Aviv chuan a pha thung.
Israel-a inthlanpui hma ni chiaha report thar tihchhuahah hian commission chuan kum 1967 atanga Israel-in a luah tan, West Bank-ah hian sipai beihpui thlak, a cheng sate laka tharum thawhna, civil mite laka ‘zau leh awmze nei taka chet’ an ti nasa tih tar lan a ni.
“Israeli thuneitute leh an sipaite hian West Bank-ah hian mihringte laka tih loh tur thil nasa taka tiin mi nuai chimihna, sawisak, pawngsual leh mipat hmeichhiatna hawia tharum thawhna an thlen nasa hle a ni,” an ti.
Geneva-a Israeli mission chuan report hi ‘Israel hnuh hniamna tura dik lo taka chhuina leh dan bawhchhiaa chhuah tumna’ niin a sawi.
“Khawvelin commission-in a chhuinaa a thil hmuhte hi an hnawl a, thiah an phut a ni,” a ti bawk.
UN investigative team hi member pathum niin UN Human Rights Council-in kum 2021-a a din a ni.
November, 2025 thleng khan South African High Court judge Navi Pillay-i’n kaihruaiin tun thla tir khan Nobel Peace Prize dawng tura thlan a ni nghe nghe.
Commission-in report thar a siam hi October, 2023 atanga Istaeli leh Palestinian venhim hna thawktuten taksa leh rilru lama mi an tihnat, an hliam leh an tihhlum bik chhui zuina a ni.
West Bank dinhmun hi Palestinian ralthuam keng pawl, Hamas-in Gaza atanga Israel an beih atangin a hniam telh telh niin an sawi.
Commission hian Israeli thuneituten Hamas beihna an tawh avangin West Bank-a civil mite chu ‘a huhova tihduhdah’ an tum niin a tar lang bawk.
Israel-in Gaza a beihnaah hian a mi cheng zawng zawng deuhthaw baihvaiin an awm a, mi 74,500 chuang thi an awm tawh niin Gaza-a health ministry chuan a sawi.
UN Office for Coordination of Humanitarian Affairs chuan October 7, 2023 leh October 9, 2026 inkarah East Jerusalem telin West Bank-ah Palestinian 1,143 thah an ni a, heng zinga 250 vel chu naupang niin an sawi.