Mitthi vui beihna chhan let nan Jordan-in Syria kap

Jordan chuan kar kal taa mi pakua thihna, Kristian invuina hmun beihna chhan let nan an sipaiten Syria-a ‘firfiak pawlte’ an bei tih an puang.
Syrian health thuneitute chuan hmeichhia, naupang leh putar telin mi panga an thi tih sorkar chanchinbu an hrilh a. Chhim lama Daraa province-a khua an kap niin an sawi a. Jordan chuan an indo thlawhnaten ‘mi firfiak eng emaw zat’ an that a, an hliam bawk tih an sawi ve thung a, thui an sawi lo.
Jordan chuan Syrian sorkar nen inrem siama ti niin a insawi a. Syria erawh chuan Thawhtannia beihna hi hrilh an ni lo niin an sawi ve thung.
Zirtawpni khan Karak-a Greek Orthodox biak ina mitthi vui inkhawm beih niin mi pakua thah an ni a, mi dang 34-in hliam an tuar bawk.
Jordan-in a ram chhung a beihna chhan let nan Syria chuan ramria an inkalpawhna a khar nghal.
“Lehlam lehlam atanga passenger leh sumdawnna thil kal thinte chu ramri kânna hmuna thawktute leh zin mite him nan khar a ni,” tiin Syrian thuneitute chuan an sawi.
Jordanian thuneituten ‘dan pangngaia inbiakna’ an hawng a, an ram beihna chu ‘eng thil nge an bitum chiah hriat nan chhui a ni ang’ tih an sawi bawk.
Jordan leh Syria inkarah mihring leh sumdawnna thila inkalpawhna awm chhun chu Nassib a ni.
Thawhtanni chawhma khan venhim hna thawktu hotu lian chuan kartawpa biak in beihna kaihhnawihah Jordanian venhim hna thawktuten mipa unau leh an makpa an man tih an lo sawi tawh.
Public Security Directorate (PSD) chuan an hming an puan loh ‘mi firfiakte’ hi Karak-a in rauhsan tawhah an lo biru chu vartianah an man tih an sawi.