Tha zawka bawlhhlawh sawngbawl dan turah Serchhip MJA-in rawtna an thlen

Tha zawka bawlhhlawh sawngbawl dan
turah Serchhip MJA-in rawtna an thlen
MJA Serchhip District chuan tha leh him zawka bawlhhlawh sawngbawl a nih theihnan district bawrhsap hnenah rawtna an thlen.
Serchhip MJA hian Thawhtanni khan an president Kapliana Pachuau hoin bawrhsap Paul L Khuma an hmu a. Kumin October 28-a MJA Serchhip District-in Green Herd New Serchhip enkawlnaa Serchhip khawpui leh thingtlang khuaa Solid Waste Management Centre Lungrual ram New Serchhip ami an tlawh tuma an thil hmuh leh hriat dan, tun aia tha leh him zawka bawlhhlawh sawngbawlna kalpui a nih theihnan rawtna hrang hrang an thlen.
MJA hian Solid Waste Management Centre (SWMC) ah hian in sakna/ thiahna bungraw chhia sawngbawlna tur a awm loh avangin bawlhhlawh khawntuten mipui atangin in sakna / thiahna bungraw chhia hi an la thei loa, mipui tan heng bawlhhlawh hi kawl reng theih a nih loh avangin a hmun loa bawlhhlawh paih a awm phah thei niin an hria a, heng bawlhhlawh paihna hmun tur hi a rang lama ngaihtuah tha an tih thu an sawi a ni.
SWMC-a bawlhhlawh sawngbawl tura lakkhawm hi a dahkhawmna tur in (building) ah a len loh avangin pawnah, ruahsurin a nan theih turin tam tak dah a ni a, ruahsurin bawlhhlawh a nan chuan bawlhhlawh atangin mihring tana thil tha lo tam tak (pesticides, herbicides, lead, arsenic adt) a luang chhuak thei dawn a, a thlang lawkah Serchhip mipui tui tlan, Tuikum lui a awm bawk si avangin, bawlhhlawh sawngbawl tura lakkhawm hi ruahtui nan theih lohna tur hmun hula dah ngei a tul tih an sawi.
Bawlhhlawh lakkhawm hi tam tak a inchhekkhawl lohna’n rang taka thliar hrang zung zung turin thawktu tun aiin tam thei zawk se tha an tih thu an sawi a. Serchhip khaw pum leh district chhunga thingtlang khua bawlhhlawh zawng zawng sawngbawlnaa hmang tur chuan tuna SWMC hi chuan a dawl zo dawn lo hle ah an ngai tih an thlen a ni.
Green Herd-in bawlhhlawh a sawngbawlna hmun hi bawlhhlawh tawih thei lo sawngbawlna tur hmun a nih laiin, mipuiin tawih thei lo bawlhhlawh karah bawlhhlawh tawih thei (sa thi tawih leh mihring ek thlengin) an lo dah tel chang a awm thin tih a enkawltuten an sawi tih Serchhip MJA hian an sawi a. Hei hi mipui hriselna khawih thei thil a nih avangin mipuiin tha zawk leh fimkhur zawka bawlhhlawh an thliar theihnan hma lak (mipui hnenah zirtirna pek nasat lehzual emaw bawlhhlawh thliar tha lote hrem emaw) a tul tih an thlen a. Bawlhhlawh tawih thei atanga leitha siamna tur ruahman theih nise tha an ti bawk.
“2025 August 4 atangin SWMC New Serchhip Lungrual ramah Green Herd-in bawlhhlawh a sawngbawl tan a, bawlhhlawh tawih thei lo chiah sawngbawl niin, bawlhhlawh tawih thei chu Dawngzawla UD&PA bawlhhlawh paihna hmunah paih a la ni a, helai hmunah hian Serchhipa bawlhhlawh chi hniha thliar hranna – Chhiahtlang North & South leh bawlhhlawh chi li-a thliarna – New Serchhip North & South VC area bakah thingtlang khaw 24-a bawlhhlawh sawngbawl a ni a. Heng bak, Serchhip khawpui chhunga bawlhhlawh dang chu Dawngzawl lamah paih a la ni rih,’ an ti.
Bawlhhlawh tawih thei lo phurhkhawm chu chi hrang hrangin – sarang, plastic, thir, darthlalang, thawmhnaw, electronic bungraw hlui leh lehkha lam chi-ah lo thliar hran a ni a, chu’ng bawlhhlawh thliar hran tawh sa chu a nem mukna khawl (bailing machine) hmanga nem mukin dah hran an ni a, heng bawlhhlawh thliar hran hi phai lam atangin an rawn leisak leh thin tih an sawi bawk.