Intiamna tihlawhtling sawrkar la awm lo – MBJP president

Mizoramah intiamna tihlawhtling thei leh tihlawhtling ta sawrkar vawiin thlengin mipuiin kan la hmu lo tih BJP Mizoram president Dr K Beichhua MLA chuan a sawi.
Thawhtannia an party office-a inkhawmah BJP State president Dr K Beichhua, MLA chuan, sawrkar kal tawhten sawrkarna an siam dawna mipui hmaa an inzawrhna – NEDP, NLUP, SEDP leh Hand Holding Policy hmang hian ei leh barah kan ram intodelhna min thlensak em, tih chu zawhna lian tak a ni tih a sawi. Policy hrang hrang hmanga mipuia inzuar kan ram politician-te hian intodelhna pakhat mah min la thlen lo a, BJP sawrkar hun an nghakhlel tawh hle,” a ti.
Mizoramah an intiamna tihlawhtling thei leh tihlawhtling ta sawrkar vawiin thlengin mipuiin kan la hmu lo nia sawiin, an policy leh manifesto chu dawt sawi nawmna atan an inziahthat siak mai mai niin a sawi.
Power-ah kan intodelh loa, thildangah pawh intodelhna kan nei mang lo a. Heng avang hian kan ramin thu chauha hmangaihtu ni lo, a taka thawk a, thutiam anga ding thei sawrkar kan mamawh tih a sawi.
“Mizoram mamawh ber chu ei leh bar intodelh, power-a intodelh, tui hnianghnar in tur intodelh, health infrastructure changtlung tak neiha phai lam pan ngai lo khawpa intodelh, kawng tha leh tlo tak neih leh mipui mimir mamawh awlsam zawka an chhawr theihna tur hi sawrkar din chhan a ni. Chutiang ti hlawhtling thei party chu BJP hi a ni a, kan state tereuh tê mihring cheng pawh tlem tê hi hneh taka enkawl thei turin theihna kan nei a ni,” a ti.
Congress party-in BJP chu Kristiante tana hlauhawm leh Kristianna nena inmil lo anga a sawi thin chu BJP hruaitu emaw BJP member Kristian atanga Hindu-a inlet ta tumah an la awm loa, Congress president pawhin an auhla a thawk tha loa a ngaih chhan chu Kristian missionary-ten harsatna an tawh vak loh vang a nih a rin thu a sawi.
‘BJP chu Kristiante tana him, Congress hruaitute anga Kristian ni chunga Hindu serh leh sang khawih an ni ve lo. Mizoram kohhran leh Congress party pawhin zirchiang se, kan ram hmasawnna tak tak thlenna tura kan awmna tur dik tak BJP atanga ram rawngbawl hna thawk turin ka sawm a ni,” a ti.