P&E minister-in power-a intodelh theihna tur dap

On Nov 4, 2026 0 0

Power & Electricity minister F Rodingliana chuan kawlphetha-a Mizoram a intodelh theihna turin kawng a dap zel a. Sawrkar laipui bakah hemi kaihhnawiha sumfai tum thei tur bank hotute a sawipui.
Sawrkar laipui Ministry of New & Renewable Energy (MNRE) leh International Solar Alliance (ISA) tangdun buatsaih ‘Bharat Renewable Energy Summit & Expo 2026’ ah New Delhi-a neihah F Rodingliana hi a tel a. He summit hi Thawhtanni khan Prime minister Narendra Modi chuang hawngin, hawnna programme hman zawh hian Union MNRE minister kaihhruaiin state chief minister-te leh Power minister-te pual Round Table Plenary Session buatsaihah tel nghalin, Mizoram power sector tihchangtlunna tur mamawh a thlen.
Renewable energy sector-ah kawlphetha tam tak thar chhuak turin Mizoram-in theihna a ngah tih a sawi a. Hemi haichhuak tur hian Renewable Energy ministry puihna mamawh a nih dan a sawi.
MNRE ministry-in kumin kumtira a tihchhuah thar – ‘Small Hydro Power Development Scheme’ hmanga puih dan dap turin a ngen a. PM Suryaghar: Rooftop Solar Scheme kalpuiah Mizoram chu a titha pawl a ni tih sawiin, central subsidy bakah state subsidy pe tel state tlemte zingah Mizoram a tel tih Union minister hi a hrilh. Solar hmanga kawlphetha tharchhuah tipung tura state sawrkarin hma a lak dan a sawi bawk.
Thawhlehni khan P&E minister hian Delhi Mizoram House-ah New Development Bank (BRICS Bank) aiawhte kawmin, Tuivai Hydro Power Project siamna atana funding chungchang a sawipui a. NDB aiawhte hian funding an pek theih tur thu a sawi rualin, sawrkar laipui Department of Economic Affairs (DEA) kaltlanga tih a ngai dawn tih hrilhin, DEA nen indawr hnuah la inbiak leh turin thu an dah a ni.
Mizoram P&E minister hi sawrkar laipui Ministry of Power chuan November 2 khan North Eastern Regional Power Committee (NERPC) chairman-ah ruat thar a. Mizoram Power minister zinga he dinhmun chelh thei hmasa ber a ni. NERPC hi Danpui Electricity Act 2003 behchhana Ministry of Power hnuaia din niin, hmarchhak state 7 chu member an ni.