US chuan computing company Megaspeed-in tech giant Nvidia-in a siam chip-te China-ah an thawn em tih an chhui mek a, an ramin bungraw thawn chhuah khuahkhirhna an neih an bawhchhia em tih an en a ni.
US Department of Justice leh Department of Commerce thuchhuah intawm siamah Singapore-a firm hi kum 2024 atangin an lo chhui tawh tih an tar lang.
US-in China hnena AI chip tha chi thawn chhuah a khuahkhirh chungin China a thleng tho nia rinna a awm atangin an chhui a ni.
Hetiang chanchin hi tun hnaia Nvidia dintu, Jensen Huang-a’n nupui nei chunga Megaspeed executive thin, Alice Huang-i a lo kawp tih a darh atanga darh a ni a. US thuneitute chuan Beijing tana enthlatu niin an ring a, China erawh chuan a nih loh thu an sawi ve thung.
Huang-a hi Alice-i lo pawh kawp dang a nei tih hai lan a nih hnuah kar hmasa khan Nvidia-a chief executive a nihna a bansan zui a ni.
Megaspeed hi Asia chhimchhaka Nvidia chip lei tam ber niin heng chip tha chite hi China hnenah thawn chhawng leh nia rinhlelh a ni a. Singapore-a company pawh hian Pathianni khan anmahni chhungkuaah an sumdawnna kal dan chu an chhui dawn tih an lo puang tawh bawk.
US Justice leh commerce department-te hian Thawhtannia thuchhuah an siamah chhuinaah hian ‘miin an ngaihven ang takin thu dik leh dik lo chiang takin an hria ang’ tih an sawi.
Kum 2024 atang daih tawh khan Megaspeed hi ‘thil thawn chhuah khuahkhirhna bawhchhia nia an lan avangin’ an lo chhui tan tawh tih an tar lang bawk.
May, 2025 khan Department of Commerce atanga chhuituten Nvidia atang hian ‘Megaspeed-ah leh mi dang kaltlangin’ thil an hralhna an lo dil tawh a. June, 2025 khan Nvidia hian Megaspeed hi ‘no sell’ list-ah an dah zui bawk.
Hemi thla vek hian Bureau of Industry & Security chuan Singaporean dan kengkawhtute nen Megaspeed hi an lenchilh a, hetih hun laia chief executive ni mek, Alice Huang-i pawh an kawm.
Hemi hnuah hian Department of Justice chuan Megaspeed-in dan an bawhchhia em tih chhui hna hi a kutken zui a ni.
Nvidia-a buaina (scandal) hian US Treasury leh Commerce department-te inkarah Megaspeed hnena chip tha chi thawn chhuahah inhnialna a awm phah.
Zirtawpni khan Treasury Secretary Scott Bessent-a chuan Howard Lutnick-a kaihhruai US Commerce Department chu ram pawna chip thawn chhuah en fel tawk lovah a puh.
Lutnick-a hi Nvidia-in an chip tha chi a thawn chhuah kaihhnawiha a department hmalakna sawi turin thla tharah Senate Banking Committee-ah a inlan dawn a ni.
Singapore-ah hian AI chip tha chite hi ram dang company hnena khapna a awm ve lo va, hei hi US-in thawn chhuah a khuahkhirhna bawhchhiatna a ni thei ve thung a ni.
Huang-a hian Congress hmaa inlan tur pawhin a pawm tawh a, heng zingah hian a ngaihzawng neihin US himna a tiderthawng thei em tih zawt fiah tura House Select Committee on China nena sawiho pawh a inpeih.
White House chuan Thawhtanni khan China-in Nvidia ang chi firm atanga AI chip an neih khapna chu la kalpui zel tur a nih thu a sawi.
Huang-a’n a nupui lo kawppui a nei hi AI-a US leh China intlansiak mek laia khawvela firm hlu ber pakhat, AI industry-a company lian ber pakhat ni bawk a tibuai hle a ni.
Get real time updates directly on you device, subscribe now.
Next Post