West Bengal-a Kristian pawl chuan Krismas lo thleng turah biak in leh sikulte an himna atana fimkhur tura chahin harsatna an tawh chuan rang taka biak in dar vawi thum tiri nghal turin an chah.
Bangiya Christiya Pariseba (BCP)-in Nilainia thurawn an tihchhuahah, “Biak ina thawk leh an chhungten thil rinhlelhawm emaw, biak in leh pastor chenna huam chhunga thil pangngai lo lut an awm chuan rang takin biak in dar vawi thum tihrik tur a ni,” tiin an tar lang.
A hun bi pangngai lova hetiang ri an hriat chuan an mite leh an thenawm hnaia awmte chuan rikrum thil a awm tih hriaa tlan khawmin an pastor leh biak in vawnhimna turin hma an la thei dawn tih an tar lang a. “Hlauhawm emaw, mi lut ru emaw an awm a nih chuan a hre hmasa berin police station hriattir nghal tur a ni,” an ti bawk.
Thurawn tihchhuahah hian biak inte chu CCTV camera daha hmun pawimawh bik te, a luhna lai leh pawn lam lang theia la tur dah turin an ti a. Thlalakna pakhat chu zau taka biak in chhung tilang thei tura chhawp turin an ti bawk.
BCP thupuangtu, Herod Mullick-a chuan pastor, parish priest leh kohhran ziaktute chu a hma lama police leh thuneitute hnenah Krismas an hman dan tur, Pathiannia an inkhawm dan tur leh pun khawm hun bi an siam te lehkhaa hrilh lawk turin an chah tih a sawi a. Lehkha chu an thehlut ngei tih finfiahna nei turin an chah bawk tih a sawi.
Mullick-a chuan May thla atang khan Kristianten beihna vawi 50 dawn an tawk tawh nia sawiin a titu-ah Hindu pawlte a puh a. Thil thleng hmun thuma thena hmun khat awrh bakah thubuai ziah luh a ni ngai lo niin a sawi bawk a. “Hmun tam takah chuan a tuartu hian police station a thlen chuan nasa zawka beihna an tawh an hlau a ni,” a ti.
Police hnena an then hian hma an laksak thin niin a sawi a. “A tam zawkah hian chhuinaah sakhaw thil avanga buaina chhui chhuah a ni ngai lo va. Mi tlem man an ni a, police hian buaina tisosang zel zawng tur ven a tum hle a ni,” tiin police officer pakhat chuan a sawi.
BCP-in kohhrante hnena thurawn a pekah hian an hung chhunga lut emaw, tibuaitu emaw nena tharuma inbeih te, inhniam te, nawrhna lam hawia chet te ti lo turin an ti a, dan ang taka hma la zel zawk turin an chah a. “BCP Legal Cell rang taka biakpawh nghal tur a ni,” a ti.
Hetianga Kristianten thurawn an tihchhuah hma lawk hian West Bengal-a rorel lai, BJP hruaitu, Samik chuan Kristian missionary sikul chungchang a sawi a, sawi zui a hlawh hle a. BJP sorkarin British hnuhma chu an titawp zel dawn a, Kristian missionary sikulte chu ‘ram dodal zawnga’ an chet chuan khar an ni dawn tih a sawi a ni.
Bhattacharya-a hian British-te an chhuak tawh chungin an hnuhma tam tak a la awm tih a sawi a. Kolkata-a a missionary sikul chuan an zirtirtu chu BJP thutkhawma hmuh a nih hnuah serthlum rawng saree kaih tawh lo turin an ti niin as awi a ni.
West Bengal Association of Christian Schools Secretary Father Moloy D’Costa chuan hetiang thusawi awm hian Kristiante beihna a thlen tam mai mai dawn niin a sawi a, an tawrhna chu a tam hret hret zel niin a awi bawk.
Bengal Christian Council President Reverend Paritosh Canning-a chuan Kristiante zingah hlauhthawnna a awm phah a, Chief Minister Suvendu Adhikari-a chu inrawlh vat turin a ngen.
BJP thupuangtu, Debjit Sarkar-a erawh chuan Bhattacharya-a thil sawi hi sikul pakhat bik a nih thu a sawi a. “Hetianga titu sikul hi chuan a inhria a. Kan party hian Kristiante hi kan duh lo lo va, danpui leh anti-conversion law ang zelin kan kal a ni,” a ti.
Get real time updates directly on you device, subscribe now.