A-ah thli a ziaawm, kang thelhtute tan kawl a êng tan

Khaw awm danin a zir tak hret avangin ni kaw chhung zet Los Angeles-a nasa taka chhiatna thlentu ram kang hmun hnih thelhtute chuan Ningani hian tlema hun duhawm an tawng ve hret dawn ta.
Hurricane tluk dawn zeta chak thli, meikang tichak em emtu leh chhanchhuah hna thawh pawh tibuaitu chu a ziaawm ta hret a, tunah chuan thlifim aia chak hret chauh a ni tawh.
Ram acre 40,000 chuang zet kang tawh hmun hniha lian taka ram kangte hi thelh tuma beih mek zel a ni a, hma pawh an sawn zel.
Mi 25 vel thi leh thil ding tihchhiat 12,000 chuang a awm tawh a, America ram chanchina ram kang chhiatna thlentu lian ber dawttu a ni tawh.
A kang nasa zual pahnih, Eaton leh Palisades-a mite chu chawlhkar khat chuang a kang tawh a, Mexico leh Canada atanga thelhpui tura kalte nen nasa takin tihmih tum a la ni.
“Kan kang thelhtute hian chhun zan zawm takmeuhvin heng ram kangte hi a zavaia tihmih tumin an bei a ni,” tiin Los Angeles County Fire Chief Anthony Marrone chuan Ningani tuk (India-a zan lam)-a thuthar lakhawmtute a kawmnaah a sawi.
Thuneitute chuan a hma darkar 24 liam ta chhungin ram kang hi a kan zau belh tam lo niin an sawi a; mahse, a la kan kai lohna hmun ro lutuk leh boruak ro lutuk chuan thli chak tawh lo mah se hlauhthawnna a la siam reng tih an sawi.
Marrone chuan hna hmasa chu mei thelh mih fel a ni phawt tih a sawi a, mi cheng inthiar chhuakte chu chawlhkar khat chuang tal, engmah hlauhawm a awm tawh lo tih a chian hma loh chu an la haw thei rih dawn lo tih a sawi.
Californian 82,400 vel chu inthiar chhuak tura tih tawh an ni tih Los Angeles County Sheriff Robert Luna chuan a sawi.
Luna chuan mi rawk, inthiar chhuak tura tihna leh curfew bawhchhia mi 47 vel man an ni tawh tih a sawi.
National Weather Service (NWS) pawhin inralrinna sang ber a tihchhuah chu a hlip leh rih tawh a; mahse, la puan leh ngai mai thei dinhmunah an la ding.
California chhim lam hmun thenkhatah chuan thli chak lo hretin boruak hnawng deuh hret tawh mah se kangmei hlauhawmna hmun a la awm reng tih BBC Weather forecaster Paul Goddard chuan a sawi.
Chawlhkar khat awm leh tur chhung hian California-ah hian ruah sur tur hmuh lawk a la awm lo bawk.
Thuneitute chuan Santa Ana thli, ram kang timankai chak em emtu chu uluk takin an la thlithlai zui reng a. Thli hi kar thar tir lamah lo thawk leh thei turah an ngai a, red flag warning pawh tihchhuah leh theih reng a ni.
Thli thawk leh tur hi darkar khata km 48-80 vela chak ni thei tura ngaih a ni.
Kang nasa ber, Palisades Fire chu a thelhtuten bei zelin a kan zauh belh lo nia an hriat thu Cal Fire incident manager Jim Hudson chuan a sawi.
Hei hian ram acre 24,000-a zau a kang tawh a, Ningani zan thleng khan 20% chuang hret thelh tawh a ni.
“Thli thaw a nep deuh chuan thil duhawm lam kan hmuh theih ka beisei a, mi pawhin nun kawng pangngai zawhin dam khaw chhuah leh intun din leh lam an ngaihtuah theih tawh ka beisei,” tiin Los Angeles Mayor Karen Bass chuan Ningani khan a sawi.
Kang thelhtuten hma sawn zel mah se heng lai velah hian hlauhawm a la awm reng bawk.
“Kangmei chhuahna velah hian boruak bawlhhlawh tak leh lum tak a la awm reng a ni,” tiin Hudson-a chuan Nilainia Malibu-a thuthar lakhawmtute a kawmnaah a sawi.
Hudson-a hian kang thelh tur hian mi 5,100 dang tirh chhuah belh leh tura tih a ni tih a sawi bawk.
Kar tir lamah khan LA County Medical Examiner’s Office chuan kangmei avanga thi 25-na an puang chiang a. Los Angeles County-ah hian mi 31 vel chin hriat loh an la awm mek niin Ningani khan a puang bawk.
Thi tam ber hi Eaton Fire-a mite niin hei hian khawpui hmar lama ram acre 14,000 chuang a kang chhe tawh a. Kang thelhtuten 55% an thelh mit tawh.
Eaton Fire tuartu thenkhat chu an chenna inah haw leh phalsak an ni tawh a, sang tel erawh inthiar chhuak tura tihna thupek hnuaiah an la awm a, zan lamah pawh curfew la puan mek zel a ni.
Chenna in sang tel kang chhe tawhin American chanchina ram kang man to ber a tling tawh. He kangmei avang hian Los Angeles chhehvela cheng te chuan harsatna an tawk nasa hle.