Russia tan African 1,700 chuangin ral do – Ukrainian FM
Russia tan African 1,700 chuangin ral do – Ukrainian FM
Ukraine-a indonaah Africa mi 1,700 chuangin Russia tan an bei mek niin Ukraine Foreign Minister Andrii Sybiha chuan sawiin Moscow-in indona atana hman turin a bum thu a sawi.
Ghana-a an foreign minister nen thu a sawinaah, Sybiha chuan Africa ram puma sorkarte nen inbiakna neih mek a nih thu sawiin, an mipuite chu hetiang scheme-a an luh loh nan hmalak mek a nih thu a sawi. Ghana hian nakkumah African Union regional bloc a kaihruai dawn a ni.
Sybiha chuan thuthar lakhawmtute a kawmnaah, “Russia chuan Africa mipuite chu indona rapthlak takah hruai luh a tum tih chiang takin kan hmu a ni,” a ti a. “Kan data atanga a lan dan chuan tunah hian Africa khawmualpui atanga lo kal mi 1,780 chuang Russia sipaiah a tang mek a ni,” a ti.
African fighter-te hi khawmualpui puma ram hrang hrang 36 aṭanga kal an ni tih a sawi bawk.
Russia thuneitute chuan dan loa African-te a ram sipai tura lakluh nia sawi chu a pha thung.
Hetih lai hian African mipate hi hna pek an tiam a, Russia-ah an hruai lut a, Ukraine hmatawngah an tawp tih report a awm nasa hle a, hei hian Moscow leh he thila inhnamhnawih ram ṭhenkhat inkarah buaina a siam mek a ni.
Ghana Foreign Minister Samuel Okudzeto Ablakwa chuan Russia tana beitu Africa mi tam tak chu bumna tuar an nih thu sawiin, “Hna pangngai pek an tiam a, dark web-ah an thlem a ni,” a ti.
“Sipai tang turin engmah hriat sa an nei lo. Training an la nei lo a ni,” tiin Ablakwa chuan a sawi a. “An thlem leh bum mai mai an ni a, chutah chuan hmatawngah dah an ni,” a ti.
Ablakwa chuan Ukraine nena an inlungrual thu a sawi a, indona tihtawp a nih theih nan inkahhai tihtawp a phut a, Thawhlehni khan indona a kum li tlin lawmna a ni a. Ukraine President Volodymyr Zelenskiy hnenah Ghana mi pahnih, Russia tana bei tura an mante chhuah zalen turin a ngen dawn tih a sawi bawk.
Ghana chuan African Union president a nih chhungin trafficking network-ten bumna hmanga Russia sipaia tang tur mi lakluh chungchangah mipui hriattirna tur scheme a kalpui dawn tih Ablakwa chuan a sawi.