A ba-a sak relief camp sa zo hnai

Hlimen-a leimin tuarte awmna tur relief camp an sa zo hnai a, Nilaini hian a awm turate an luh kim a beiseiawm tih thu dawn a ni.
May ni 28-a remal cyclone leh a ruah ken vanga leimin tuarte awmna turin Hlimen khawtlangin relief camp hi an sa a, pahnih an peih tawh a, a dang pawh an peih hnai.
Sorkar atangin tanpuina an hmu lo chungin camp hi a bain an sa a, July ni 4 khan a baa an sak in pakhat atana senso Rs 1268355 chu an dawng. Hei hi June ni 22-a chhungkaw 10-te luhna in sakna senso a ni.
Sorkar atanga sum dawn a awm lawk loh avangin camp satute hi an mangang hman a, ba an ngah dawn em avangin sak chhunzawm zel tur a ni em tih thawm te pawh a awm hman. Chutih rual chuan sak chhunzawm lo se, a mamawhtute mamawhna a sang si a, chutiang karah chuan camp pakhat sakna senso hi an dawng ta a ni.
In pakhat dangah July ni 2 khan chhungkaw 10 an lut leh a, tuna an sak mekah hian chhungkaw 21 an awm turah ngaih a ni. Heng in pahnihte senso hi sorkar atanga hmuh an inbeisei thu an sawi.
An hruaitute sawi danin, sorkar thu hmua relief camp hi sa an ni a, senso an hmu lo chungin, hmuh beisei chungin an sa a ni. In pakhat atana senso an dawn hian a dang pawh lo chhunzawm tura tih an ni.
Hlimen atanga thu dawn danin, relief camp-a awmte leh awm leh turte hi kuthnathawka eizawng vek an ni a, mahni in leh lo an chhuahsan hnuah chhungte belin an awm a, chhungkaw thenkhat chu hmun khatah lut lovin an insem darh a ni.
Hlimen-ah hian sorkarin riak chhuak tura a tih ni lo, mahse fimkhur thu-a riak chhuak chhungkaw 10 vel an awm tih thu dawn a ni.