Puk lo thei loa min siam avangin kan puk zel a ngai

Sawrkar kalta leiba phur chungin an sawrkar a, sum puk lo thei loin an siam a, an la puk zel pawh a ngai dawn tih minister C Lalsawivunga chuan a sawi.
Thawhtannia an party office-a inkhawmah ZPM hruaitu C Lalsawivunga chuan, MNF sawrkar khan leiba cheng vaibelchhe 13584.80 a hnutchhiah a, khatihlaia budget pumpui kha a vaiin vbch. 14209.94 niin, an budget hnuhnung bera leiba tling khawm kha budget pumpui atangin zaa 95.6 a tling niin a sawi.
“He leiba phur chung hian ram rorelna kan kalpui chho a, puk lo thei loa min siam avangin kan puk a, puk chhunzawm zel pawh a la ngai ang. He sawrkar hian sum kan puk a nih pawhin a hmanna tur dik takah kan hmang dawn a, dik tak zelin kan kalpui dawn,” a ti.
An tih dik loh pawh ni lo, tha taka an thawhte sawiselna a tam a, chief minister phei chu mimal takin an bei nasa tih minister hian sawiin, “Opposition party-te hian politics nia an hriat chu rorel lai sawisel a ni ber a, thudik tawk lo leh rintlak mang lo hmangin a rem dan danin sawrkar an sawisel a; kan dik lo a nih chuan min sawiselna kan pawm a, a dik min hrilh turin kan beisei bawk,” a ti.
Kum 37 sawrkar inchhawk chhunga an tih theih loh, tih ngam loh leh tih duh loh thil tha chu thla 7/8 vel lek sawrkar hian a tih chat chat zel avangin sawisel bak tih theih an nei lo tih a sawi a ni.
A department chana hmalakna sawiin C Lalsawivunga chuan, LAD-in kum 1953 Village Council Act & Rules a hman chu a hlui tawh a, siamthat an tum mek a, VC/LC inthlan hunah chuan dan thar hnuaia inthlan theih an beisei tih a sawi. 15th Finance Commission hnuaia 2021- 2022 grant chu chinfel loh a la ni a, an sawrkar hnuah chinfel niin rang leh dik takin a kalna turah sum an kaltir zel tawh tih a sawi a ni.
Art & Culture department-ah Chapchar Kut pawh budget-ah an nei tawh a. AH & Vety hnuaiah saa intodelh turin ran chaw atanga bul tanin, Thenzawl Vety Farm-ah tin 72-a zau an siam a, vaimim bakah bekang-ah hma an la tih a sawi bawk.