A ban tur thu leh a sawi turte an president-in a hre lawk?

2021 November leh December velah kha chuan Congress vice president a ni dawn emaw tih tur a ni a, a ni dawna ngai hman te pawh an awm. Amah pawhin ni mai theiah a inngai ang. Hun a liam a, 2023 June-ah chuan Congress party atangin a bang.
Minister hlui KS Thanga’n Zirtawpni khan party atanga banna ziakin a thehlut a, Congress president Lalsawta’n hei hi a lo hre lawk niin a lang; KS Thanga sawi tur pawh a hre lawk a ang.
KS Thanga hian chawhnu lamah banna hi a thehlut a, Aizawl South III-ah chhuahpui a nei. Chawhma lamah an tih dan pangngaiin Congress party-in political session an nei a, chutah chuan Congress president Lalsawta’n KS Thanga an ui tih te a sawi thei tawh.
“Vawiinah hian South III-ah party chhung atanga chhuak an awm nual mai a,” a ti a, hming hmerha KS Thang hming lam riin, “Pu KS-a te pawh, hetah kan hotu langsar tak a ni a,” tiin, “Party atanga ban te a tum phei chuan kan ui tak zet a ni tih kha vawiinah hian ka han sawi a ni,” a ti. Hemi a sawi hian ngaithlatute’n kut an lo beng a ni.
Lalsawta hian a sawi zel a, “Corruption ber kherah hi chuan min beih chuan dawt a ni a, finfiahna an neih loh chuan, ka man hi a to khawp ang,” a ti.
Chawhnu lamah KS Thanga’n banna a thehlut a, Lalsawta chu Congress sorkar laiin amah Lalsawta remtihna thlapin mi hnenah pawisa a mamawh thu a sawisak a, cheng nuai 25 an pe a, a (KS Thanga) kutah an dah a, a hnen atang chuan Lalsawta’n a la niin a sawi.
KS Thanga ban tur thu an hre lawk tih a chiang a, thil a inthial rei tawh tih pawh a chiang.
2021 December ni 17-ah Congress hian an president Lal Thanhawla an thlah a, ani hi Lalsawta’n a thlak a ni. Heng lai atang hian neuh neuh an ngah a, Chief minister hlui Lal Thanhawla hi mawi takin an thlah na a, bang tura nawrna a lo nasa tih pawh KS Thanga hian a rawn puang ta chiah; a banna lehkhaah hian Lal Thanhawla banna atan signature an lakhawm tih a sawi a ni.
Thu dawn danin, Serlui bial bye-election neih lai khan Delhi atanga zin haw Lal Thanhawla’n Lalsawta leh Zodintluanga te a ko a, chawlh a duh niin a sawi. Mahse bye-election neih dawn lai te a ni a, chutiang chu a hun rih lova an hriat thuin an chhang.
Bye-election hnuah chawlh a tum ta chuang lo a, tuna bang ta KS Thanga hi vice president-a dah a tum a, party thupuangtu atan pawh mi pathum ruat thar a tum tih thu dawn a ni. Mahse, party chhungah ngaihdan a inang lo a, an president hi chawl tawh tura duhtute’n langchang takin thil a ti. Chutiang karah chuan KS Thanga pawh vice president a ni ta lo a ni tih thu dawn a ni.
An president a chawlh theih nan hian executive committee member-te zingah leh Aizawl khawpuia MLA bial tina Congress party aiawhte atangin signature an la tih thu dawn a ni.