A chhia-in a \ha bawhbet…

Tun hnaia Ist Power Lifting Championship, Dinthar YMA hall-a neih hmanpuitu minister Lalruatkima, bialtu MLA ni bawk chuan, ‘Mizo thalai zinga zaa sawmkaw chuangte an chhuanawm em em laiin tha lo tlem azawngte avangin Mizo thalaite kan pum puhchhiat fo thin a…’, tiin Mizo thalaite chu hnam rilru pua taimakna nen hma lam pan zel turin a fuih a.
Mizoram hian record duhawm lo tak tak heng — cancer tamna, zuk leh hmuam ching tamna, ruihhlo hluarna, HIV/AIDS hluarna, eiruk hluarna etc. te hi a nei a. Hengte avang hian mi thenkhat chuan Mizoram hi chhe lailet der, a chhia hlir awmna ang hialin an sawi duh fo mai a. Heng record duhawm lo tak takte hi a tha lo reng lah tak a; mahse chhe lailet der anga inngaih phahna tur leh rilru tihhnualna tur chi a ni lo va; chutih rualin, a chhe lam hi ngaihthah phah tur erawh a ni chuang hauh lo.
Minister-in a sawi ang khian, kawng dik zawhtu thalai zaa sawmkaw chuangte aiin kawng diklo zawhtu thalai zaa 10 pawh tling lote an langsar zawk a, chu chuan zaa sawmkaw chuangte puhchhiatna a thlen ta thin a, kan hmu nikhualo zo ta vek mai thin niin a lang. A awmzia chu: thalai 100 rual zingah mi pahnih khat an insual buai a, midangin thelh an tum a, an buai luai luai mai a. Ralkhat atanga lo thlirtu thenkhat chuan an rawn phek en vek tawh avangin chulai hmuna tlangval za rual vel zet pungkhawmte chu buaina siama pungkhawm an ni tawh mai tihna a ni.
Hetiang deuh bawk hian thil dangah pawh ‘a tha lo’ tlemte avangin ‘a tha’ tam zawk kan hmuh nikhua loh phah thei tih a lang a. Sawrkar hnathawk leh politician zinga eiru thin ten, a eiru ve lo, a let tam taka tam zawkte hming leh hmel an tichhia a; sawrkar hnathawk leh politician-te kan hmuh dan a hê zo a, kan vaihma ta mai thin niin a lang. Chutiang bawkin thalai zinga ruihhlo tih ching mi tlemte avangin, ‘thalai zawng zawng’ kan hmer tel vek ta thin a, a tlem zawkin a tam zawk kan bawhbehtir ta mai thin a ni.
Chumi awmzia chu, a tha lo tlemte hian a tha lam tam zawkte hi an bawhbet reng mai tihna a ni a, chu chuan ngaihtuahna tha lo leh mahni inngaih hniamna a hring a, chu chuan hmasawn zelna kawng a dal thei thin. ‘Kan chuti khati’ tia a thim lam ringawt sawi sawi lo hian, ‘kan chuti khati ang a, kan ti thei ang’ tia a eng lam thlir chunga hmasawnna thar nei zel tura ruahmanna kan siam thin a ngai a ni.