A chung berah Chawngpui FC

September 14, Ningani khan Mizoram Premier League 10, round ngana khelh zawh a ni a. Champion lai Chawnpui FC chuan team lian Aizawl FC an hneh a, table chung berah an inhlangkai. Ningania inkhel hnuhnung zawk, inkhel hmuhnawm takah si hnih an phurh hmasak zet hnuin Mizoram Police FC in Chanmari FC lakah tlawm an pumpelh a, point khat hlu tak an hmu.
Champion lai Chawnpui FC leh MPL team hlawhtling Aizawl FC te hian 1st Bn. MAP Ground-ah inkhel hmuhnawm an lantir a, goal pawh a lut har hle. Goal thun tuma an innawr tawn chhen hnuin minute 62-naah Peter Lalrinhlua chuan hmahruaina goal a thun. Goal thun hmasa zawk an nih vangin champion lai Chawnpui FC in inrintawkna sang zawk an nei a, na zawkin an khingpuite an nawr theih phah.
Na taka an khingpuite an nawr rah an seng a, Chawnpui FC tan min David Lalchhuanawma chuan minute 82-naah an goal hnihna a thun a, an hma-hruaina a tizau. Goal hnih an chhuah zawn hnuin Aizawl FC in goal thun tumin thapui an thawh a, chhuah belh huamin an khingpuite an nawr. Na takin an khingpuite nawr bawk mah se goal erawh an thun thei mai lo. Hun pek belh tawp dawn tep thlenga goal an thun thei loh vangin goal an thawkchhuak zo lo tura ngaih a ni hman. Hun tawp thlenga an huaisen rah an seng a, minute 90+7-ah R Ramdinthara chuan goal thunin an si phurh a sut then ta nge nge.
Goal an thun vangin phur thar mah se Aizawl FC in goal an thun belh thei tawh lova, tlawm zawkah an tang zui ta a ni. Team lian Aizawl FC laka hnehna an chan vangin Champion lai Chawnpui FC hian khelh nga atanga point 11 hmauin hmahruaitu an ni a. Point 11 tho hmu tawh Chanmari FC chungah an awm rih.
Chawnpui FC leh Aizawl FC ten inkhel hmuhnawm an lantir hnuin Chanmari FC leh Mizoram Police FC te an inhmachhawn zui ve leh a, goal hnih chhuah hmasa mahse MPFC in tlawm an pumpelh hram a, harsa takin point an hmu.
Table chung bera awm thei dinhmuna ding Chan-mari FC leh Mizoram Police FC te hi an inhnehtawk viau a, goal pawh a lut lawk lo. Chawlhlawk hmain CFC vannei zawkah an tang a, chawlhlawk dawn hnaihah goal an thawkchhuak. Minute 45+1 naah Lalrinzuala chuan an lamah a ti-goal palh hlauh a, hei goal hmang hian si khat faia hmahruai chungin Chanmari FC chawhlawk an hmang.
First half-ah goal lut har viau mah se second half-ah erawh goal a lut thuai thung. Second half tan atanga minute khatna lekah Ramngaihsanga chuan Chanmari FC goal hnihna a thun a, an hmahruaina a ti zau. An elpui lian lakah si hnih an phurh vangin MPFC hi season thara a vawi khat nan an tlawm mai a rinawm hman.
Dinhmun chhe leh zuala an din hnuin MPFC an insiamtha a, minute ruk chhung lekin goal hnih an thun zawn a, tlawm an pumpelh. MPFC tan hian : Lalrothlanga chuan minute 61-naah hmahruaina goal a thun. Lalrothanga goal hian Police team a fuih phur viau a, na zawkin an khingpuite an nawr zui leh nghal chat a, an hlawhtling leh ta thuai bawk.
Goal thun tuma thapui thawh Mizoram Police FC tan hian Lalthantluanga chuan minute 67-naah an goal hnihna thunin, an si phurh a sut zo. Goal hnih ve ve an thun hnuin inkhel hmuhnawm zawk an lantir a, goal thun tuma an innawr tawn a hmuhnawm thei hle. Innawr tawn viau mah se goal an thun belh thei lo ve ve a, 2-2 a inhnehtawkin, point khat ve ve an hmu ta a ni. Chanmari FC hian season tharah tlawm an la nei lo va, vawi nga khel tawhin point 11 an hmu a, pahnihna an ni mek. MPFC hi season tharah vawi khat an tlawm tawh thung a. Khelh nga atanga point 8 hmuin, pathumnaah an awm ve mek thung. MPL 10-ah team hrang hrangte an inel tawk viau a, champion tuma tan an khawh a hmuhnawm a, team hrang hrangin hma an sawn hlawm hle.

MPL 10 Table
Team Play GD Point
1 Chawnpui FC 5 6 11
2 Chanmari FC 5 3 11
3 Mizoram Police FC 5 3 8
4 Aizawl FC 5 2 8
5 Electric Veng FC 5 0 7
6 Chhinga Veng FC 5 -2 5
7 Project Veng FC 5 -5 2
8 FC Venghnuai 5 -7 1