A chung berah Tottenham

Thawhleh zana English Premier League inkhel awmchhunah Tottenham Hotspurs chuan an mikhual Fulham chu si hnih faiin an hneh a, Manchester City leh Arsenal lehpelin, table chung berah an kir leh.
Season tharah manager thar Ange Postecoglou hnuaiah beisei phak bak a khel tha Tottenham hian an mikhual Fulham lakah an khel tha leh viau a. Captain Son Heung-min leh James Maddison te goal thun hmangin hnehna an chang a, point thum an hmuh belh. Spurs hian season tharah point khat chiah an la hloh a, chu chu an elpui lian Arsenal nen an inhnehtawk kha a ni. Season tan tirh khan an goal thun khawl Harry Kane awm lova inlan an ni a, an captain Hugo Lloris a chhuak bawk. Heti a nih vang hian an talbuai rinna lian tak a awm a. Vawi kua an khelh thlengin buaina reng reng an nei lova, an khel tha ta viau thung.
An mualah goal thun tuma tan khawh Tottenham hian Fulham chet fuh loh an hrem, Calvin Bassey ball pet chhe tak chu an chan khalh a. Richarlison siamsak atangin captain Son Heung-min chuan minute 36 naah hmahruaina goal a thun. Tottenham Hotspurs stadium hi kum 2019-a hawn kha a ni a. He khelmualah hian Son hian goal 50 a thun tling der tawh. A kawppui fuh tak Harry Kane awm lo mah se Son hian goal thun a thulh duh chuang lo a ni ber mai a, a chetha tluang hle.
Son goal thun hmanga hmahruai chungin Spurs in chawlhlawk an hmang a, chawlhlawk hnu lamah goal an thun belh leh thuai. Nipui bazar laia an lak fuh tak James Maddison chuan minute 54-naah Son Heung-min siamsak atangin an goal hnihna a thun a, an hmahruaina a tizau. Goal thun belh tumin tan khawh zui viau mah se goal dang an thun belh thei lova, Fulham pawhin an si phurh an sut thei bik lo.
Fulham lakah an chak leh tak vangin palinaa tlahniam hman Tottenham chuan khelh 9 atangin point 23 an hmu a, Liverpool, Arsenal leh Manchester City te lehpel vekin table chung ber an luah let leh. Table chung bera Spurs an kir laiin Fulham erawh chuan khelh 9 atangin point 11 chauh an la hmu a, 12-naah an awm mek thung.