A CLOSER WALK WITH ORGANIC FARMING – 10

RK Dawla
Mb 9366095658

1. Tuichangrâl leh Mizoram khawthlang lamah hian Lo an vât hma deuh a, hâl pawh an hal hma deuh a. A bâk ho hian tunkar chho, sawrkar hun tiam tâwp karah hian kan hâl chho dawn a. Mizoram hmun zosâng lamah chuan a la vawt hle a, phai zualah chuan zan lamah a vawt zual deuh chauh tawh a. A laihawl velah chuan zanah boruak nuam tâwk viau mah se, chhun lam chu a lum tan viau a. Tin, kumin hi thei leh thing a pâr tam riau a, nikum November leh December ruahtui tha khan a nghawng a ni mahna. Hetianga pâr a tam hian Mizo Upaten thli nat kum tiin an lo hrilhlâwk thin. Kan khawvel boruak kan thlir pawhin West Bank leh Gaza ang maiin, La Nina a intur chho mek bawk. Ruah, rial leh thli tam kum kan hmabâk chho mêk niin a lang. Khuai khawi mite tân erawh thing leh thei pâr tam kum hi kumtha a ni viau âwm e. Lui kam nul siam thinte tân erawh sik leh sa enthlâk a ngai deuhin a rinawm. Tuilianin thlai a tihchhiat leh chiah hlum a tam thin a. Kawngpui leh Link road pawh leimin leh tuihawkin a sawisak nasat kum a ni thei bawk.
2. Pathianin kan ramngaw neihsate hi chhawng chi hrangin a thuam a. Chutiang system chu sik leh sa inthlak lakah pawh a him bik thin. Hei tak hi thlai kumhlun chingtute pawh hian bengsika kan zir chian a tul chho hle. Leilung hian khuhtu thilto chi hrang a ngah a, nisa leh ruahtui direct laka vêngtu a neih that hian, amahin a insiam tha telh telh thin. Tunhnai chhova thil thleng fo chu, pa taima huan apiang a rawih chak a; pa thatchhe huan apiang thlai a tlo. Hei hi a chhan nia lang chu, leilung leh a khuhtu hnim kan manage dan azir niin a lang. Hnim têt laia kan tihfai zung zung hian lei a kalral tam a, hnim kan khawih loh lutuk lahin thlai an dîp ria thung. Chuvangin, a inkarah kan dah thiam a tul chho viau. Hnim hi lian leh chang deuh hleka zuah a, a pâr chan hmaa thing leh mau tlawn hmanga ROLL a fuh chho. Hnim lian tawih chuan leilungah fungi a titam a, chu chu thlai kumhlun chuan a mamawh a. Hnim no sàm tawih erawh chuan bacteria a titam ve thung a, thlai kumhlun lo lamin an ngeih thung. Engpawhnise, hlo tûr hmanga hnim sawisak hi lei tihchhiatna tha ber pâwl a ni a, ngaihtuah chian deuh a tha. Lei chhia apiangah hnim a bitin, hlo ngai a to nawn zing a. Lei a lo that khan hnim pawh a thâwlin, hlo ngai to lovin a chi dang a rawn inthlâk mai thin. Leilung lam ngaihtuah tel lêk lova, ralpui phiara hnim kan phiar hi SIM a hun e. Nature do zawnga cropping & plantation kalpui hi a hautak a, tlo a har a, damdawi bawlhlo hlauhawm tam tak a chawh tel thin, siamchawp leitha thlengin.
3. Kumkhat thlai emaw thlai kumhlun pawh nise, kumina pawimawh tur chu kan hrerhiamin a rinawm. Ruahtui a tam dawn vangin changkham leh contour trench siam uar a hlâwk ang a. Huan vangtan zawng( contour planting)-in thlai kan chin uar pawh a pawimawh dawn. Hei hian tuihâwkin leilung a sawisa nasa lutuk tur a vêng ang. Ruahtui a tam chhoh chuan, favangah lei a da hman hle ang a, thlai râl leh rannung a puang hluai thin. Chaw tha kham lo leh tawrhna nei thlaite hi natna leh rannung hian an target thin a, hei hi nature kalphung pangngai pawh a ni. Thlai enkawl tura pawimawh hmasa ber chu leilung enkawl kha a ni a. Leilung a that chuan thlai an tha mai a, lei a lo chhiat chuan a tuar hmasa bertu chu kan thlaite an ni thin. Pathianin ram nuam tak Zofate min pe a. Hei hi thiam taka enkawl turin farmer zawng zawngten mawh kan phur e. Vai leitha leh tûr hlauhawm pui puite hmang lo hian, hlawk takin thlai kan tharin tlo takin leilung kan enkawl thei e.