A CLOSER WALK WITH ORGANIC FARMING – 2

RK Dawla
Mb 9366095658

1. Tun hnaiah Sikkim chuan Organic University an nei thar a, Meghalaya chuan Natural farming Degree course an hawng thar bawk. Keini thung chuan Horti College, Thenzawlah kan nei hrâm a, an inrem phuisui chho mêk. Kan ministry tharah hian Chemical Fertilizer dealer keini chuan kan la chai leih leih chauh. A awmzia ni taa lang chu na taka rual-el tur kan nei hnaivai hle tihna a ni. Khawvel chanchinthar kan thlir chuan, lei tel lova thlai chin (Hydroponics) pawh organically-a kalpui thei khawpa thluak hmang peih khawvel hmun dangah chuan kan hre chho tan mêk. Chutih laiin kan ramah chuan Jhumming atangin ram buai hun lai vela India rama kan uar tawh, chemical farming lam kan lût vel chauh a ni mai a. Kan dinhmun hi a veitu tân chuan, manganthlâk ru ang reng tak niin a lang. Seasonals thlaiah chemical fertilizers & pesticides kan hmang nasa a, thlai kumhlun (perennial plantation)-ah pawh kan kàngkai chho tan mêk.
2. Organic farming hlawhtlinna kailawn pakhat chu a ram leilung milzawng thlai thlan chhuah thiam hi a ni âwm e. Mizoram zîm tê hi leilung a dang hlawm êm êm a, tuipui atanga a sànzawng leh sik leh sa nat dan pawh a inchen lo êm êm. Tlangram kan nih miau vangin, 1km bial chhungah pawh leilung leh sik leh sa nat dan inthlau tak tak kan nei thin. He dangdaihna (diversity) hi kan hriatthiam a pawimawh êm êm. Thlai kumhlun ching turte tân phei chuan, kan ram neihin a ken deuh thlai hriatthiam kha thil pawimawh takzet a ni a. Tin, seasonals hovah pawh hei hi a dik êm êm tho. Kan duh duh, a hlâwk nia kan rin ang ang kan ching mawp mawp hi chu Mizoram leilung atân chuan a fuh chiah lo deuh a ni. Ram thuhmuna thlai chi 4/5 ching thinte chuan kan hrethiamin a rinawm. Enkawl dan inang rengah, thlai thenkhat chu tharhlâwk bik leh natna vei nêp thin kan neih ngei a rinawm. Khang thlaite kha ramin a ken deuh bik thlai tiin kan sawi thei ang. A leilung atang mai ni lovin, a locational level leh microclimate atangin kan dap thiam a ngai a. Awlsam taka hriatchhuah ngawt theih a ni lo bawk. Farmer-in research & experiment hun rei tak a lo kalpui tawh hnu-a hriat theih chauh a ni thin, kan tun lai dinhmun atang chuan.
3. Sawrkar tharah farmer-te tân thil tha tam tak kan hmu chho mêk a. Thil lawmawm tak a ni. A bultan nân Aizawl khawpui chhung kawngpui chu chhuanawm taka cheithat a ni mêk a. Chutih laiin Lunglei khawpui chhung kawng khawih a ni ve ta a. A quality a chhe êm êm a, zahpuiawm tak a ni leh lawi a. Hetiang kan nih chuan, farmer-te link road phei chu ngaihtuahawm tak a ni hle dawnin a lang. Chu mai ni lovin, district dang Lawngtlai, Siaha, Khawzawl etc khawpui chhung kawngte hlei hlei a ngaihtuahawm ta a ni. Lunglei mipuite hian hetiang kawng repair satliah, tlo lo tur tih hriat reng reng hi an phû kan ti em? Hetianga hnathawh quality inthlau leh hmasawnna khairual lo hi a tuar bertu chu farmer-te kan ni daih thin. A chhan chu kan ram chhungah kan tam ber a, kan che vel nasa ber bawk. Kan ram hian infrastructure tha – kawngpui, kawlphetha, medical, education etc nei ila, a chhawr nasa ber bertu turte chu farmer-te kan ni a. Ram enkawlna thil chhia pawh a tuar nasa ber ber tur tho kan ni. Hei hi hria-in kan sawrkar thar pawh hian, theihtawpin tan la sela. Pathianin Mizoram malsawm rawh se.