RK Dawla
Mb 9366095658
-- Advertisement --
1. June thla a ni a. Sehfa lam tho leh thosi, saphihrik leh rannung chi hrang hrang tam vanglai a ni chho a. Tin, sephung pian anga piang rannung chi hrang hrang leh lungphur phengphehlep bâkah khau chi hrang hrang an tam tan hle. An inthlahpun vanglai hun a thleng chhova. Heng rannung chi hrang hrangte hi kan huan leh lo atangin kan tibo vek thei lova, kan tibo vek tur a ni hek lo. A hnawksak zual tur kan ven khan a tâwk êm êm a ni. Heng fur rannung tam berte hi chu Lo emaw huanah Light trap chhiin, a hnawksak zual tur chu a suat theih êm êm a ni.
2. Thei kung bul tihfai that a hun leh chho ta bawk a. Balhla kung ngêt te, theihai leh ser lam etc kung ngêt vên dan tha ber chu Light trap siam leh a kung bul tê tihfai that hi a ni. Balhla bik hi a hnah ruang ro hi ruahsur loh kâra fawm khawmin, a hung karah fur laia hal zeuh zeuh hian balhla-in a ngeihin rannung tihhlum leh ven nan pawh a tha êm êm a ni. Tûr leh chemical chelek hi awlsam viauin lang mah se, a sawhkhâwk tha lo kan tawrh leh thin avangin hman loh hrâm hrâm hi a him phawt a. Tin, kan thlaite hian eitu an neih miah loh chuan, thil fel lo lian tak a awm a ni zawk. Zawhna ka dawn tam ber pawh, “Engin nge kah tur?” tih a ni thin a. Inchung pot lian deuha thlaite rannungin an rawn bawm a, kuta hmeh hlum theih reng, damdawi hmanga kah tur emaw ti tlatte atangin zawhna ka dawng fo mai. Rilru piansualna lian tak a ni, hetiang hi. Tin, huan leh lo lamah pawh kutdurh (blister beetle) rawn puang tan hi Samtawk leh Bawkbawn kung 2/3-ah kan hmu fo. An tam tak tak hma-in, glove buna man rêm mai kha a tha zawk.
3. Natna tam tak pawh damdawia kah kher lohva enkawl theih a tam thin. thenkhat phei chu natna-in a khawih lai hnah or zâr paih mai khan, leitha pe hlekin an dam zui ve mai thin bawk. Chemical pesticides (herbicide, insecticide, bactericide, fungicide)-te hi a nazawng leh thlazena hman chi an ni lova, a tul tâwp lovah chuan hman loh hrâm hrâm a him ber. Thlai chawm nâna leitha pêk kan uar khan rannung leh natna tam tak lakah kan inveng nghal thin. Hemi lam uar si lova, thlai hrisel vak lo leh chaw tha kham lote pesticide kan barh vak vak hian a hlawk tak tak thei chuang lova, a dam full tak tak thei chuang lo.
4. Tun laiah chuan rannung kah nân pawh organic pesticide tam tak a lo chhuak tawh a. EN (Entomopathogenic nematodes, rannung eihlumtu rulhût, thlai leh mihring huat si loh) te, rannung thattu fungi tangkai (Entomopathogenic fungi – Beauveria bassania, Verticillium lecanii, Metarhizium anisopleae etc) te lei tur a awm tawh a. Hengho hi chu thilnung niin tûr an ni ve lova, a hmangtu mihring leh kan thlai enkawlte tân nghawng tha lo an nei ve lova, hriselna atân pawh a him êm êm bik a ni. Online shopping (Amazon, Flipkart etc)-ah pawh chah tur a tam tawh êm êm. Tin, Mizoram chhung ngeiah, Vermicompost leh Vermiwash te, lei theih tura zuar an awm nual tawh a. Heng leithate hi hmang uarin, kan leilung hi duat bawk ila. Tichuan, organic farming hi kan ramah kan uar chho zel ang a, kan lo hriselin kan lo dam rei deuh deuh dawn a ni. Tun dinhmunah chuan, tûr kan hmuh theih ang ang hmangin, thlai eichhetu rannung kan suat puk puk a. Kan thlaia tûr zungzam hlauhawm tak kha keimahni leh kan thlai eitute taksaah a lût zel a, hnam hrisello leh bawrhsawm tak kan nih mêk hi. Chemical hmangin thar hlâwkin sum ngah mah ila, tûr hnathawh vanga kan hriselna a chhiat chuan, enge maw sâwtna awm chuang ang le? Mahni pawh insaseng thei tawh lo khawpa bawrhsâwm Nuai 1000 neitu ai chuan, thal laia PWD alkatra chhuanga berh ni tin thin Dumka labour khan khawvel a chên zawk daih lo’ng maw?