RK Dawla
Mb 9366095658
-- Advertisement --
1. July thla kan chuangkai tan a, 2024 kum chanve chu kan thleng ta. Kumin ber kher hi chu ‘La Nina’ vangin ruahtui kan dawng hma a, a ken tel thli leh rial bâkah ruah tam pawh kan dawng tel nual a. Thil a danglam chho viau a nih loh chuan, nakum lamah chuan ‘El Nino’ kan hmachhawn chho lehin a rinawm a. thal nâ leh rei tak kan tawng chho leh turah ngai ila. A bikin thei huan enkawltu tam berte chuan, leilung khawro vanga harsatna kan tâwk chho leh hle dawn a ni.
2. Kumin hian ruahtui tla hma vangin thilto a chawr chak a, hei vang hian pest pawh a puang deuh niin a lang a. A bikin sap sucking pest kan tihho – aphids, mealy bug, scale insect, thrips, whiteflies etc an puang deuh niin a pang. Lo lama kan thlai chin hrang hrang – fanghma, maian, bawrhsaiabe leh behlawi chenin Mosaic virus natna hmuh tur a tam ang reng a. Heng virus natnate hi sap sucking pest-ho thehdarh a ni tlangpui a. Virus natna kai hi an rah thei tho thin a, chûng rahte atanga a chi kan chhuah leh kha a him ta thin lova. Hei vang hian, thlai chi thlan kawngah kan fimkhur a ngai chho hle dawn niin a lang e. Ram changkang leh state dangah chuan, a chi tura thlai chin bik neiin, uluk bikin an enkawl a. Natna leh rannung lakah pawh a bik taka vengin enkawl a ni a. Chutiang atanga thlai chi an siamte chauh chu chingin, thlai hrisel zawk leh tharhlawk zawk an siamchhuak thin. Keini chuan Aizawl/Lunglei etc Bazar thlai chi zuarah kan innghat deuh tawp a, thlai chi quality vawn that kawngah kan la hniam êm êm rih.
3. Tin, tui dahkhawlna siam lamah kan harh thar a tul hle. Thlai rah atanga sum lalût ve nual si, ruahtui/kawr tui khawlna siam tura sawrkar beisei tlat kan tam hle-in a hriat bawk. Sawrkar chêt hma-in mahni mamawh chu a theih ang anga lo intodelh kha duhthusam zawk a ni. A nihna takah chuan, thla 6 chhung tawp ruah sur loh nei tlangpui thin Mizoram-ah hian, leilung kalral vên leh ruahtui/kawr or lui tui khawlna hi priority pêk nachâng lan hriat a tul thlu tawh hle. Thlai phun tamte hi uan nan kan la hmang deuh roh emaw ni..Enkawl hneh loh tur tih hriat reng reng thlai phun nghek hi uanna chi ni lovin, âtna chi khat zawk a ni. Farmer tam ber hian thlai phun leh hnim sàm chauh hi farming activities ti mai kan tam hle mai thei. Khawvel sik leh sa lo danglam zel mil tur chuan, hnim sàm tluka pawimawh thildang, huan enkawlna tur activities a tam khawp mai.
4. Fur khawchêng kan nei chho mêk a. Hetih hun lai hian thlai kumhlun hmunah chuan, hnim khawih rih loh a fuh tlangpui zawk. Thlai kung bul tifaiin, a bâk chu hnim zuah chan hlek kha a tha zawk a. Hnim no kan sàm chuan a tawih thuai a, an rawn chawr leh vat bawk a. A tawih atanga leitha insiam kha a tlem tham thin a. Hnim chang tawh sàm erawh chu muangchangin a tawih a, hnimtawih atanga leitha insiam a tam zawk a. Hnim rawn chawr leh a muang bawk a. A tha zawk êm êm, kan ram leilung tân. Keimahni duhdan mil ni lovin, kan ram leilung leh sik leh sa mil zawngin chêt kan lâk thiam a tul e. Kumkhat thlai chingho pawhin, kan hnim thlawhna vaua paih leh thlawhlaia chhep darh ral mai mai lo deuhin, hnim hman tangkai lamah kan harh thar a ngai a. Zêm kualin, chutah chuan phuai leh ran êk tlêm nen, kan hlo thlawhna hnimte thiarkhawma uptawihin, favang leh thlasika hman tur leitha tam tak kan thar thei reng a ni. Hnim kan hman thiam a tul e…