RK Dawla
Mb 9366095658
-- Advertisement --
July thla laihawl a ni a, 2024 kum chanve lai tak kan hmang mêk. Ruahtui kan dawng pangngai chho zel a. Favang ruahtui hi pangngaiin kan dawng chho êm ang a. Kumin hi ‘La Nina’ kan tawng hlauh a, ruahtui kan pangngai hma a, a tihzia viau a. Kumthar lamah hian ‘El Nino’ kan hmachhawn lehna chance a sâng leh deuh niin a lang a. Hei vang hian khawkheng rei emaw ruahtui mumal har kha nakum lama kan issue a ni thei reng a. Chuvangin, kumin favang riahtui ha hi nakum lam atân kan mamawh êm êm a ni.
Hetih mêk laiin kan India sawrkar pawh a buai riau a. A chhan chu ramdanga kan eitur thawn chhuah-ah, pesticides zungzâm an hmu tam riau a. Hei hian sawrkar dang a tirâlkhêl viau mai a. Ram tam takin India aanga eitur an lakluhte an titlêm sâwt hle a. Indian economy-in nasa taka a tawrh dawn avangin sawrkar laipui pawh a ang êm êm a. Agri College syllabus-ah Natural farming subject telhtirin, Natural farming College hial hawn a ni chhova. Central sawrkar enkawl agency-te, hmanni lawka chemical farming sawimawi êm êmte pawh tunah chuan an reh ta diak a, natural/organic farming lamah hmasawnna thlentir tumin hma an la chho mêk a ni.
Hetih lai hian kan Mizoram zim tê thlir ta ila. A ram pumpui ang chuan, farming lamah kan la lût thuiin kan la lût ril lo hle a. Kan farmer-te pawh bangbo ve tak tak, organic leh chemical pesticide pawh hre hrang lêm lo kan ni tlangpui a. Khawpui chawmtu farmer zingah chuan, chemical fertilizers leh chemical pesticides-te hi an hmelhriatna rei tawh mah se, thingtlang lamah erawh kan uar thar an mêk a ni. Heti sawi ila, a fiah âwm e – ram changkang chu sawi loh, kan India ram pawhin a hnê a, kawng dang him dam zawk a zawnsan tan tawh, chemical farming kha kan ram mipui nawlpui chuan kan hmelhriat ve dawn tan chauh tihna. Ram ngai reng enkawltute chuan, a tantir (1 or 2 decade)-ah chuan, chemical farming hi thar hlawkna leh sum leichhuah tamna, economy chawikanna tha tak niin an ngai ve thova. Nikhua a lo reiin, a thatlohna hmuh tur a tam telh telh tih an hmuchhuak ta thin. Kan ramah chuan, ram ngai reng ni lem lo, kum 1 atanga kum 3 chhung enkawl, seasonals thlai chinnaah chemicals kan hmang tam chho tan hle. Chemical tello chuan thlai a thar theih loh hiala ngai pawh kan kat nuk tawh a ni. Kumhlun thlaiah pawh kan uar chho tan viau a, a result hi nakin rei vak lovah kan hmu chho leh thuai turah ngai bawk ila.
Engpawhnise, thui thlir thiam vak lo Mizote hian, thawk rang tak leh awlsam zawk chemical farming hi a bawhin kan bawh ep niin a lang a. Chutih hun a thlen a, a hnu lawka kan tihsual hmuchhuak a, nasa fê-a hma thar lâk leh ai chuan, tun atanga kan lo inbuatsaih hi a finthlak zawk hle dawn a. Hei hi kan thlir thiam a pawimawh êm êm. Dept leh Institution/Agency-te pawh hian, kumhlun leh hlâwk-daihrei deuh zawnga hma lâk dan tur an duanchhuah vat vat a ul a. Sawrkar pawhin hawilam fel tak a neih a tul chho ta hle. Vaiho nena inkhaikhin ngawt thei kan ni chiah lova, kan chenna leh boruak a dang a, kan hmel leh nunphung chenin a danglam êm êm. Anni chuan zanriah atân maida leh alu an ring thei mai a. Keini chuan sa (meat) mai bâkah, thlai pawh chi 4/5 chawhmeh atân kan siam thin. A awmzia chu pesticide ei tel ve ve-ah, vai ai chuan Mizoten kan ei tel tam zawk dawn, vawikhat chaw ei rau rau-ah. Tin, kan chaw ei hun inkarah, hmawmsawm leh zûk-hmuam kan uar zawk bawk. Ngun taka kan ngaihtuah a ngai e…