A CLOSER WALK WITH ORGANIC FARMING – 37

RK Dawla
Mb 9366095658

1.September thla tâwp lam hnaih hret, chhun leh zan inchen hun (Autumnal equinox, 22nd.September) kan thleng fel ta a. Zan lam hun a rei telh telhin chhun lam chan a tlem telh telh tawh dawn a. Mizoram zim tê-ah hian, tun ang hunah hian ruah bing leh kalkawng zîm tak zawh thin ruah sur fo hun lai a ni thin. Favang hun nuam leh thiang nuam tak kan hmabâk a. Fur tuilian a kàm tanin, lui sa chi hrang hrang man uar hun rûnpui kan thleng chho leh mêk bawk. tai buh thar rang zualho chu seng a ni tawh a, tlema thar tlai deuhho seng a hun leh têp a. Buhpui (thar tlai) pawh an chawr pên hun rûnpui a reh fel a, râi turin an insiamrem vêl mêk bawk. Kan hma lawk October thla hi Khuangchawi thla kha a lo ni leh reng tawh a. Tichuan, buhpui seng hun November lo thleng lehin, buh kan insingsak fel meuh chuan, Mizo Kristiante Kût ropui ber Krismas hun kan thleng chho leh mai dawn a ni.
2.Nûl leh theihuan ilo neihte kan intihhmuh chhoh tâk hnu hian, âwllên a awm tak tak thei ta lova. Favang hun pawh hi huan hnim sàm hun tha a lo ni ta zel a. Farmer tam tak tân chuan ‘Vangpui lunglen’ hun pawh a awm meuh ta lova, ‘mawng vawm ba’ ang sekin kan tûl âwl lo ta mai thin. Thlasik eichawp chawhmeh hmun siamin luipui kam lei hâng leh hmun rem kan bawh leh ruih ruih hun intan mêkah hian, awmze nei zawka thlai chin leh leilung enkawl lamah hma kan sâwn a tul chho ta hle a. Huan kumhlunah chuan, hnim tam berte pâr hun a intan chhoh mêk avangin, hnim sàm bulh lutuk kha leilung insiamthar leh tur tihchhiatna hmawr a ni a, kan fimkhur a tul hle. Hnimte hian leilung an khuh reng hi eng lai pawhin a pawimawh a. Mi tam tak chuan, hnim sah chhum tawih atangin lei thatna hi insiam pung niin kan hre ber a. Hei hi a dik chiah lo deuh. Hnim leh thiltote hian leilung thatna tur hian kawng hnihin hna an thawk a, lei hnuaia an zung nung lai atang leh lei chunga an taksa pêng tawih atangin. A nihna takah chuan, lei hnuai lama an zung kaihte hi lei thatna siampung leh vawnghim turin an pawimawh zawk daih a ni. Chuvang chuan, hnim kan thlir dan pawh hi kan thlâk hret chu a ngaiin a lang e.
3.Tin, thlasik thlai chinna tura lei kan leh hian lei a tithâwl tha a, lei mûr kâra boruak lût-chhuak puiin thlai zung mawih-tawih pawh a titlem phah thin. Mahsela, eng leilung pawh nise, lei lehphut hian tuipêk a tihautak a, leitha pêk pawh thlai ei theih piah lama a kaltir thin avangin duhthusam a ni chiah lova. Duhthusamah chuan, tuipuan chhah deuh, rawng dum, 100 micron leh a chunglam nei theite tân, thil remchâng tak a awm a. Kan thlasik thlai chinna tur kha July thlaah hnim kha sàm emaw delh bêkin, tuipuan duma khuh ni sela. Khuh hma hian kan thlai chinna tur area pawn lam hnimte pawh khuh turah hian a tam thei ang ber chap ni sela. A tlâng kha phui tha taka lei tlanga delh phui leh a nih chuan, hnimte kha an thi sam êm êm. Thla khat hnu-ah chuan, hnim hnah no zual an tawih a, a kuang chang a la inchap fil thuau thin thung. Hetiang hunah hian a khuhna tuipuan hlipin, thlep tha ila, thlai chi tuh leh tiak phun a rem ta chiah thin.
Hetiang system-ah hi chuan, rannungin thlai tiak an seh chhum ang chi kha a tlem duh êm êm a. Tin, engemaw chen (hnim ruang ro chap chhahdan azirin) tui pêk a ngai lutuk lo thin. Thlasik thlaite hian hnim no tawih (bacterially decomposed) hi an ngeih êm êm a. An hriselin an than a tha duh êm êm. Leitha dang pe lutuk lovin hlawk takin an thar thei ta thin. Tin, lei lehphut a ni ve lova, lei chunglangah hnim hnah no tawih a insemrual avangin a tâwk lekin lei a phûr a, thlai chi thlâk bik chu harsa deuh mah se, a enkawl zui leh lam a awlsam bik êm êm thin. Kan tihdan phung pangngaia kal reng lovin, awlsam zawk leh hlawk zawka thil buaipui dan kan zir chhoh zel a pawimawh êm êm e.