RK Dawla
Mb 9366095658
-- Advertisement --
1. Dt.29/10/2024 khan Aijal Club-ah Mizoram Economic Association leh Dept. of Economics, MZU hovin Mizoram Economic Summit hmasa ber an nei a. Hemi tum hian sawmna ka dawn angin ka tel ve a, a nuam ka tiin ka tlangnel nghal hle. Kan Mizoram ei leh bar dinhmun leh hmasawnna tur lamtluang thlirhona a nih angin, ram leh hnam hmangaih leh veitu tak tak, mithiam rual kalkhawm an ni a. Chawhnu lam session-ah duhzawng sawi turin min sawm ve hial nghe nghe a, a hlawkthlak kan ti tlang hle-in ka hria. Kan issue pakhat kha Climate Smart Agriculture a ni a, hemi chungchang, ground reality kha tlem ka share ve a ni. thalai rual, reality show tih vel mai maiin a chîm buai ve loh, rilru fîm leh khawhawi zau bulah khan farmer tam takte hi tâl tam ta ila, kan ram tân a tangkai dawn riaua hriatna ka nei thui hle. A thuhrimin Economist leh Research farmer-te hi kan lo inhnaih riau a. Keinin tlo leh daihrei, awlsam remchang zawka farming kalpui kha kan buaipui a; anni Economist-hovin chutianga kan thil buaipui atanga kan tharchhuahten ram economy a siamthat theih dan tur an thlir thung a. Motor ke hma leh ke hnung ang maia Research farmer-te leh economist-te kan inzui fumfê a nih chuan, thui tak kan thleng dawn nia hriatna thûk tak nên programme ka hmang tlingtla a ni ber e.
2. India ram hi a zau a, farmer pawh kan tam viau a. Chutih laiin technology changkang leh hmanraw thate hian Indian farmer-te min la luhchhuah nêp hle a. State lian leh changkang zawk tak takte pawh, tunlaia an buaipui chu ‘Stuble burning’ kha a ni thova. Nipui buh (kharif paddy) an chinte an seng zova, wheat chin leh nghal an duh avangin buh ruang (buhpawl/fafu) kha an hâl ta thin a. Hei hian a ram pum huap ang pawhin pollution a siam nasa êm êm a. Farm lian lêm lovah chuan, buhpawl kha bawngchaw ilo atân an dahkhawm a, a remchang hle. Mahsela, farm lian thamah chuan thil buaithlâk a tling a. Farmer-ten wheat an chin nghal loh chuan, ram chhungah atta/maida/wheatvai kan tlachham mai dawn bawk si a. State dang sawrkar leh Central sawrkar pawh a lu a hai êm êm thin. Mizoram context-ah lût ta ila, leilet leh tlangramah buh kan ching uar viau a. Nimahsela, kan buh chin atanga by-product – buhsi, fafu leh buhpawl hman tangkai zuina kawngah Mizote kan la che chaurau hle mai a. Sumdawnna leh eizawnna (entreprenuership) atân hman tangkai tham zet erawh leilet leh tlangram leilet atang hian buhpawl kan thar kum tin chuan a lang. Buhpawl hi ferment chuan, fodder tha tak, dahthat rei theih kan thar chhuak theiin a rinawm a. Buhsi pawh hi rawh vâpin a hawl kha lei tihthat nân (Soil amendment purpose) atân a hmantlâk bâkah, pho rova herdip khan favai (rice bran), ranchaw atâna material tha tak a la ni tho tho a ni. Hetiang thil ngaihtuahnaa senglut leh buaipui tak tak tur hian thalai lehkhathiam zawkte farming-ah rawn lût chur chur sela kan va ti thin êm…
3. Kan hmanraw neihsate hman tangkai hi economy chawi kâng tura thil tih mâkmawh niin a lang a. Entirnan : Syntex siam kan intihhmuh a! Raw materials engkim phai atangin kan chaw lût a, tichuan plant bunin kan siamchhuak ve chur chur a. Kan population atanga chhût chuan, chuti êm êmin Syntex hralh a kal tak tak thei lo. Ram danga hralh turin vai company kan ngam chiahin a rinawm si lova. Tichuan, kum 7/8 a vei ang a, Syntex siamtu thenkhat chuan Kuhva huan lamah an inleh a tul tawh mai thei, kan hrethiamin ka ring! Syntex factory tam tak aia mamawh zawk, kan ram tâna tha deuh chu, kan plastic waste-te Recycling plant hi a ni. Social media-ah kan hmu thin a, Tlawng luiah pawh rapthlâk tham plastic waste a tawlh dûl dûl kum tin a. Heng plastic waste-te hi Agriculture, Floriculture leh Home appliances etc atân kan hmang tangkai vat a nih loh chuan, kan environment tichhe khawp plastic waste kan nei thuai dawn a. Zofate hian ngaihtuahna fumfê deuh, a ram pum ang pawhin kan mamawh hle mai.